برطانیہ وزارت عظمیٰ نا گچین کاری، لِز ٹرس وزیر اعظم گچین مس

کنزرویٹیو پاٹی نا لِز ٹرس 81 ہزار 326 ووٹ ہلیسہ برطانیہ نا پُوسکنا وزیراعظم جوڑ مس۔

پیشن ملکی حوال تِروک ادارہ آتا ردئٹ کنزرویٹیو پاٹی نا لِز ٹرس برطانیہ نا پُوسکنا وزیراعظم نا عہدہ ءِ سمبھالو۔

شابیتی حوال تا ردئٹ لز ٹرس وزارت عظمیٰ نا گچین کاری  ٹی 81 ہزار 326 ووٹ دوئی کرے اندن اونا مقابلہ ٹی رشی سونک 60 ہزار399 ووٹ دوئی کرینے۔

برطانوی میڈیا نا ردئٹ لز ٹرس بورس جانسن نا وزارت عظمیٰ ٹی وزیر خارجہ نا عہدہ آ ساڑی ئس واہم بورس جانسن آن گُڈ اسہ اندُنووخت اسیٹ او اقتدار ءِ سمبھالانے ہراتم مُلک کُنوکا گِڑا و کساد بازی نا گواچی ئس۔

لِز ٹرس اینو ملکہ الزبتھ تون اوڑدئی کِن اسکاٹ لینڈ ءِ رسینگا ملکہ پوسکنا سروکی آن حکومت جوڑ کننگ نا قول ارفے لز ٹرس 2015 ناگچین کاری  آن گُڈ کنزرویٹیو پاٹی نا چارمیکو وزیراعظم مرو ۔

یاتی مرے کہ بورس جانسن ہفت جولائی آ اسہ پریس کانفرنس ئسے نا نیام ئٹ وزیراعظم نا عہدہ آن دُو ارفنگ نا پڑو کریسس بورسجانسن نا سروکی ٹی وزیرخارجہ لِز ٹرس برطانیہ نا کُننگ نا گِڑا تے مُچ کننگ کِن تُرندی ئٹ کاریم کننگ نا قول کریسس۔

او تینا گچین مہم نا نیام ئٹ عندیہ تِسس کہ او ٹیکس ٹی زیاتی ءِ ایسر و گیشتر ٹیکس دوئی کروک آتیٹ کمبوتی کریسہ کنونشن چیلنجکرو واہم نیمہ اقتصادیات نا چاہندار آتا پاننگ ئس کہ نرخ آتیٹ ودکی مرو و لِز ٹرس ءِ بھاز آ ہڑاند آتون مون تروئی مرو ۔