امریکہ نا فوجی ترجمان دعویٰ کرینے کہ یوکرین ئٹ کہی تو ئنا جنگ آن پد روس ئنا سلاک کُٹنگ ءُ و سلاء تا مڈی ءِ پورو کننگ کن قطبیکوریا آن بھلو کچ اسیٹ سلاء بہا ئٹ ہلنگ ءِ ۔
پیشن ملکی خبر تروک ایجنسی ’اے ایف پی‘ نا رپورٹ نا رد ئٹ پینٹاگون نا ترجمان برگیڈیئر جنرل پاٹ رائڈر دعویٰ کرینے کہ ’ننے داہیت ئنا اشارہ ملانے کہ روس بھلو کچ اسیٹ سلاء ہلنگ کن قطبی کوریا تون حوال کرینے۔
اندن امریکی کوالخواہ تا کنڈ آن شینک مروک بیان اسیٹ دعویٰ کننگانے کہ قطبی کوریا آن بہا ئٹ ہلوکا سلاء تیٹ توپ گولہ و راکٹ اوارمننگ کیرہ ہرا یوکرین نا برخلاف جنگ ئٹ کاریم ئٹ ہتنگ مننگ کیرہ۔
بیان ئٹ پاننگا کہ سلاء تا بہا ئٹ ہلنگ آن پاش مریک کہ روس ءِ یوکرین ئٹ سلاء تا سخت نیستی ءِ ہرا نا سوب روس آ ایلو مڈی تا ہلࣿ وتس آ رکھ خلنگ مننگ کیک۔
یاتی مرے روس ئنا یوکرین آ جلہو آن گڈ تومکا ڈیہہ تے سلاء تا باز نسخان مسنے ہرا نا نیستی ءِ پورو کننگ کن تومکا ڈیہک کوشستکننگ ءُ۔ و جنگ ئٹ امریکہ نا سیوتیک یوکرین ءِ میزائل، گولہ و پین کبین ءُ سلاء تریسہ کرینو۔ اندن روس ہم تینا سلاء تا نیستی ءِ پوروکننگ کن کوشست کننگ ءِ۔
امریکی فوجی ترجمان نا پاننگ ءِ کہ قطبی کوریا آن سلاء ہلنگ آن پاش مریک کہ روس یوکرین ئٹ تینا فوجی تے سلاء تننگ ئٹ سلاء تاکمبوتی تون مون تننگ ءِ۔
ایلو نیمہ غان یوکرین جنگ آن گڈ روس و امریکہ نا اڑینگوکا تعلقداری تیان بیدس ہم وائٹ ہاؤس دو شمبے نا دے زور تس کہ روس ءِدہشت گردی نا سروکی کروکا ڈیہہ ئنا دروشم ئٹ پن کپننگ اوفتا ایسری فیصلہ ءِ۔
وائیٹ ہاؤس نا ترجمان کیرن جین پیئر دو شمبے نا دے پارے کہ امریکہ نا صدر جو بائیڈن روس ءِ دہشت گردی نا سروکی کروکا ڈیہہ ئنادروشم ئٹ پن کننگ نا برخلاف ایسری فیصلہ کرینے۔
اونا پاننگ ئس کہ روس ءِ دہشت گردی نا ریاستی سروکی نا وڑ پن کننگ آن کُننگ نا گِڑا تا ہل٘ و تس پد تمنگ کیک و بحیرہ اسو نا ہیپارمڈی تا دننگ ہتنگ نا معاہدہ آتے خطرہ مننگ کیک۔
دا بیان اندنو وخت ئسے آ مونا بس ہرا وخت ماسکو خبڑدار کریسس کہ دا گام آن امریکہ و روس ئنا تعلقداری تا ایسر مننگ نا سوبجوڑ مرو۔
روس ئنا وزارت خارجہ نا ترجمان ماریا زاخارووا پاریسس کہ دا گام سفارتی تعلقداری تے پرغنگ نا سوب جوڑ مننگ کیک۔ اونا ودیکپاننگ ئس کہ اوفتا ڈیہہ امریکی موقف ئٹی ہر وڑ ئنا پیشرفت کن تیار ءِ۔
ولے ڈیموکریٹک و ریپبلکن پارٹی تا منَہ امریکی قانود ساز آک کہی تو آن روس ءِ دا لسٹ ئٹی شاغنگ کن زور تخنگ ءُ۔ اسہ تو اس مُستامریکی سینیٹ اسہ قرارداد اس پاس کریسس ہرا ٹی محکمہ خارجہ آن خواست کننگاسس کہ او روس ءِ “دہشت گردی نا سروکیکروک” ڈیہہ ئنا دروشم ئٹ منے۔
یاتی مرے کہ ماسکو ءِ دہشت گردی نا سروکی کروکا ڈیہہ پاننگ ہم 24 فروری آ تینا سر زمین آ روسی فوجی کارروائی آن پد یوکرین ناکُل آن بھلا خواست آتیان اسٹ ءِ۔