گورنر ہاؤس نا مونا بیگواہ آ بندغ آتا خاہوت آتا برانز برجاء ءِ۔ اینو خاران آن بیگواہ شاہ فہد و رحیم الدین نا خاہوت آک اوار مریسہ تینابرانز ءِ ریکارڈ کرفیر۔
شاہ فہد نا ہیڑ نادیہ بلوچ برانز ٹی اوار مریسہ پارے کہ کنا ایلم ءِ شانزدہ مارچ آ سی ٹی ڈی ننکان اُرا آ چھاپہ خلیسہ دزگیر کرے ہراداسکان بیگواہ ءِ ۔
اونا پاننگ ئس کہ چھاپہ نا وخت آ فورسز کارندہ آک اُرا ٹی ساڑی زَر آتیان بیدس جواننگا گِڑاتے ارفیسہ اُرا نا غٹ مڈی تے تینتوندریر۔ او ودیک پارے کہ کنا لُمہ تینا مار نا چاری ءِ و اُست ئنا ناجوڑی نا گواچی مسُنے۔ نن غُٹ قانودی کسر تیٹ ہنانُن ولے کنا ایلم آجومننگ اف۔
خاران نا اسہ پین ہندی بیگواہ رحیم الدین نا ہیڑ حاکمین بلوچ اینو برانز آ بریسہ تینا برانز ءِ ریکارڈ کرفے۔ اونا پاننگ ئس کہ کنا ایلم ءِ26 اگست 2016 آ پاکستانی فورسز کارندہ آک نن نا دو بجہ آ اُرا آ چھاپہ خلیسہ دزگیر کریر ہرا داسکان بیگواہ ءِ۔
اونا پاننگ ئس کہ ایلم نا زوراکی ئٹ بیگواہی نا برخلاف نن غُٹ قانودی کسر تیا ہنان ولے دا ریاست آن ننے مایوسی آن بیدس ہِچ اسرسینگتو ۔
اونا ودیک پاننگ ئس کہ ننا اُرا نا اسِٹ آ پُہریا کروک رحیم ئس۔ کنا باوہ و لُمہ پیر ءُ ، دا ہفت سال آن نن انت ڈُکھ آن گدرینگ اُن دانا ننےسماء ءِ ۔ او خواست کریسہ پارے کہ کنا ایلم ءِ آجو کننگ مرے۔