حوال تا رد ئٹ ہار و نوکاپ آن زیمی مروکا علاقہ آ تیٹ ڈینگی و ملیریا تون اوار اُست و پڈ ئنا دین تالان مسنے، کراچی ٹی 104،راولپنڈی ٹی 54 و اسلام آباد ٹی 43 ڈینگی نا پوسکنو کیس رپورٹ مسنو۔
تیوہ ڈیہہ ئٹ ڈینگی نا ناجوڑ آتا کچ ئٹ اسہ وڑ ودکی مننگ ءِ، ڈی ایچ او نا رد ئٹ اسلام آباد نا خلقی آ علاقہ آ تیٹ 24 ساعت ئٹی 31 و شاری آ علاقہ آ تیٹ 12 بندغ ڈینگی نا ناجوڑی نا گواچی مسنو۔
محکمہ جانجوڑی نا پاننگ ءِ کہ خیبر پختونخوا ٹی تدوکا 24 ساعت ئٹی ڈینگی نا پین 76 کیس رپورٹ مسنو، صوبہ ٹی ڈینگی آن چاربندغ کسکنے۔
خیبرپختونخوا ٹی 5 تو ئٹی ڈینگی نا اِرا ہزار 473 کیس رپورٹ مسنو، مردان ئٹی غٹ آن زیات 969 ڈینگی کیس مونا بسنو، خیبر ئٹیڈینگی نا 484 کیس مونا بسنے۔
محکمہ جانجوڑی نا رد ئٹ پشاور ٹی 117، نوشہرہ ٹی 259 و چارسدہ ٹی 86 ڈینگی نا کیس رپورٹ مسنو۔
سیکرٹری جانجوڑی نا پاننگ ءِ کہ پنجاب ئٹی 24 ساعت ئٹی ڈینگی نا 106 کیس رپورٹ مسنے۔ راولپنڈی آن ڈینگی نا 54، لاہور آن33، گوجرانولہ آن 4، گجرات آن 3 ناجوڑ رپوٹ مسنو و ملتان، قصور و بہاولنگر آن ڈینگی نا اِرا اِرا کیس رپورٹ مسنے۔
شیخوپورہ، اوکاڑہ، خانیوال، ساہیوال، مظفر گڑھ، جہلم آن ڈینگی نا اسہ اسہ کیس مونا بسنے۔
سیکرٹری صحت پنجاب نا رد ئٹ برجاء سال تیوہ پنجاب ئٹ ڈینگی نا 1912 ناجوڑ رپورٹ مسنو، برجاء سال صوبہ ٹی ڈینگی آن 4 بندغ نا کہنگ نا رپورٹ مونا بسنے۔
تدوکا دے پنجاب ئٹ 2567 ہند آ تیان ڈینگی لاروا دو بسنے، و ڈینگی ایس او پیز نا لتاڑ آ 24 ساعت ئٹی 6 جاگہ غا تیان، 48 بندغ نابرخلاف کیس خلنگانے۔
اندن بلوچستان نا علاقہ دکی ٹی جمعہ نا دے اُست و پڈ ئنا ناجوڑی آن اِرا چُنک سن مسڑ بیران و 1500 پین زیمی مسنو۔
محکمہ جانجواری نا پاننگ ءِ کہ اُست و پڈ ئنا دین بلوچستان نا جتا ضلع آتیٹ رپوٹ مسنے۔ ضلع دکی ٹی 1500 نا کچ بندغ داناجوڑی آن زیمی مسنو۔
بیران مروکا چُنا تیان اسٹ نا سن اِرا سال و اسٹ نا سن ہفت سال پاننگک۔ ضلع ٹی دا منَہ دے ٹی اُست و پڈ ئنا ناجوڑی آن بیرانمروکا تا کچ شش اسکان سر مسنے۔