بلوچستان نا جتا علاقہ تیٹ پاکستان نا فوج آپریشن کننگ ءِ۔ ہراڑے گن شپ ہیلی کاپٹر تون اوار کمانڈوک ہم اوار مننگ ءُ۔
بلوچستان نا بنجائی شار کوئٹہ نا ایب کیب ئٹ زرغون و اوار آ علاقہ تیٹ اینو سہب ئنا پاکستان نا فوج آپریشن نا بناء ءِ کرے۔ علاقائی حوال تا رِد ئٹ پنچ آن خڑک گن شپ ہیلی کاپٹر آک جتا ہند آتیا شیلنگ و تراک کریر۔
حوال تا پین پاننگ ءِ کہ کئی گھنٹہ تیسکان شیلنگ و تراک آک برجاء ئسر اندن جتا ہند آتیا کمانڈوک ہم دڑیفنگار۔
آپریشن نا سوب آن داسکان جانی و مالی نسخان تا بابت ہچ وڑ نا حوال رسینگتنے نئے کوالخواک دا بابت ئٹ گیشتر حوال تسونو۔
دا علاقہ تیٹ اِرا دے مست سلاء بند بندغ آک زرغون گیس فیلڈ نا رکھوک چوکی تیا ساڑی فورسز کارندہ غاتے جلہو ٹی ٹک کریسر دا جلہو نا ذمہ واری ءِ بلوچ لبریشن آرمی ہرفیسس۔ ترجمان جیئند بلوچ نا پاننگ اس کہ بلوچ مڈی تا استحصالی پروجیکٹس و کوزہ گیر فوج آ ترندی تون ننا جلہوک برجاء مرور۔
اندن ضلع کیچ ئٹ تمپ و دشت نا نیام تاہی مشی ہند مزن بند ئٹ تدوکا نن آن پاکستانی فوج نا مونی گام آک بناء مسر ہراڑے اینو سہب ئنا فوج نا پیادہ دستہ غاک علاقہ ٹی پیہار اندن اوفتے ہیلی کاپٹر تا کمک ہم دوئی اس۔
اندن آواران و مشکے کن ہنوکا کسرک پاکستانی فوج نا پارہ غان بند کننگانو۔ اندن مشکے نا جتا علاقہ تیٹ فوج نا مونی گام آک خننگ ئٹ بسونو داسکان اسہ وڑ نا دزگیری یا جانی نسخان نا حوال رسینگتنے۔