بلوچستان ئٹ پِر تیان گُڈ سختی تون تفوک زیمی بندغ آک مرگ نا گواچی مسر، بیران مروک آتیٹ پین ودکی درزن تا شار آک دائسکان پِر نا دیر ٹی ءُ۔
پِر ونوکاپ آن بلوچستان نا تیوہ غا 35 ضلع آک زیمی مسُر نوکاپ نا دیر آن گُڈ کُنوکا گِڑاتا نِرخ آتیٹ زیات ودکی مس سوزی تا نِرخ ئٹ ہم ودکی مس اندن نُت ئنا کمبوتی ہم دے پہ دے آن زیات مننگ ءِ۔
صوبائی ڈیزاسٹر مینجمنٹ اتھارٹی ( پی ڈی ایم اے ) نا رِد ئٹ بلوچستان ٹی نوکاپ نا سوب آن 270 بندغ مرگ نا گواچی مسونو، ہزار آ بے اُرا بندغ آک حکومت نا پارہ غان کمک کِن ہُروک ءُ۔
اندا پِر و نوکاپ آتیان بلوچستان ٹی کہوک آتیان غیر سرکاری کچ آک بھاز زیات ءُ۔ بلوچستان حکومت نا رد ئٹ بلوچستان ٹی 13 لکھ آن زیات بندغ بے اُرا مسونو،1 لکھ 85 ہزار آن زیات اُراک تمانو یا اوفتے بھاز نسخان رسینگانے بشام نا پِر تا لڑ سلیس ولے پِر و نوکاپ آن زیمی مننگ نا سوب آن بلوچستان نا رہینگوک آک جتاء وڑ نا ناجوڑی تا گواچی مسونو۔
زیمی علاقہ آتیٹ رسینگیسہ کاریم کروک پیرا میڈیکس نا پاننگ ءِ کہ ہراڑے ہراڑے نوکاپ نا سوب آن دیر سلوک ءِ اوڑے جتاء وڑ نا ناجوڑیک ودی مننگ ءُ نوکاپ آن زیمی بندغ آک سِل، گیسٹرو، ملیریا، پِڈ دڑد، پِڈ و اُست و پاش آ آزمان نا کیرنگ آ رہینگنگ نا سوب آن ہِلی مریسہ ءُ۔
یاتی مرے کہ پِر آتیان بلوچستان تیوہ غاتیان زیات زیمی مسُنے واہم زیمی مروک آتیکن حکومت و سرکاری ادارہ آتا پارہ غان بے واکی نا گواچی ءُ پِر و نوکاپ آن بلوچستان ٹی بیران مروک آتا جمعی کچ درست مننگ اف اندن بلوچستان ءِ اوار کروک کسر و ریل ٹریک ءِ تیوہ یلہ کننگ کِن کوالخواک دائسکان بے سہب ءُِ۔
بلوچستان ٹی تدوکا دے تیٹ مروک پِر تیان کہی علاقہ آتیٹ دائسکان معمولات زند بحال کننگتنے۔
فلاحی تنظیم آک محکمہ جانجوڑی، حکومت و جہانی ادارہ آتیان خواست کرینو کہ زیمی علاقہ آتیٹ دمدستی تون زیمی مروک آتا بحالی ءِ یخینی کیر نہ تو حالیت گیشتر تُرند ءُ دروشم ئس دوئی کننگ کیک ۔