پاکستانی صوبہ خیبر پختونخواہ نا علاقہ سوات ئٹی مروکو اسہ بمب تراک ئسے ٹی پولیس کارندہ آ تون اوار پنچ بندغ مرگ ئنا گواچیمسنو۔
تراک سئے شمبے نا شام سوات نا تحصیل کبل نا علاقہ ٹی مس، پولیس نا رد ئٹ بنماسی پٹ و پول آن خبر تمانے کہ دا اسہ ریموٹکنٹرول بمب اس ئس ہرا ٹی امن کمیٹی نا باسک ادریس خان ءِ ٹک کننگانے۔
پولیس نا رد ئٹ زیمی مروکا تیٹ ادریس خان آن بیدس اِرا پولیس کارندہ ہم اوار ءُ۔
پولیس جون تے دوئی کریسہ سیدو شریف ٹیچنگ اسپتال آ سر کرینے۔ و پولیس علاقہ ءِ گھیرہ ٹی ہلیسہ ودیک پٹ و پول بناء کرینے۔
وزیراعلیٰ خیبرپختونخوا محمود خان دا تدینی نا نوٹس ءِ ہلیسہ انسپکٹر جنرل پولیس آن رپورٹ خواست کرینے۔
او کہوک آتا خاہوت آتون ڈکھ ئنا درشانی کریسہ پارے کہ اودے دا ساہ تا ضیاع آ ڈکھ مسنے۔