بلوچستان نا ضلع ہرنائی ٹی فوج ئنا اسہ ہیلی کاپٹر اس آپریشن نا وخت آ تمیسہ بھس مس، ہرا ٹی اِرا پائلٹ تون اوار شش فوجی کارندہ مرگ ئنا گواچی مسر۔
پاکستانی لشکر نا شعبہ تعلقات عامہ (آئی ایس پی آر) نا رد ئٹ یک شمبے نا نن لشکر نا اسہ ہیلی کاپٹر اس فلائنگ مشن اسیٹ ہرنائی ٹی فنی خرابی نا سوب آن تمیسہ بھس مس۔
ہیلی کاپٹر انت مشن ئسے آ ئس و اونا بھس مننگ نا اخس وخت آن پد اوڑے فوج ئنا کارندہ آک سر مسر دا بارو ئٹ آئی ایس پی آر شابیتی حوال شنگ کتنے۔ ایلو نیمہ غان بلوچ لبریشن آرمی دا ہیلی کاپٹر ءِ بھس کننگ ءِ منانے۔
آئی ایس پی آر نا رد ئٹ ہیلی کاپٹر ئٹ پائلٹ میجر محمد منیب افضل، پائلٹ میجر خرم شہزاد، نائیک جلیل، صوبیدار عبدالواحد، سپاہی محمد عمران و سپاہی شعیب سوار ئسر۔
برجاء سال بلوچستان ئٹ پاکستانی لشکر نا ہیلی کاپٹر نا تمنگ نا دا ارٹمی تدینی ءِ۔
داکان مُست تدوکا تو اگست ئٹ نوکاپ آن زیمی تیکن لسبیلہ ٹی ریلیف آپریشن ئٹ اختہ ہیلی کاپٹر بھس مسس۔
آئی ایس پی آر نا رد ئٹ ہیلی کاپٹر مننگ کروک فنی خرابی تا سوب آن تماسس ولے دا نا ہم بھس کننگ نا ذمہ واری ءِ بلوچ سلاء بند تنظیم “براس” ارفے۔ دا تدینی ٹی کور کمانڈر کوئٹہ لیفٹننٹ جنرل سرفراز تون اوار شش لشکری افسر مرگ ئنا گواچی مسوسر۔
ہیلی کاپٹر نا تمنگ نا ارٹمی تدینی ضلع ہرنائی ٹی مسنے۔ ہرا اسہ جنگ زدہ ءُ علاقہ ئسے۔ ہرنائی ٹی داکان مُست ہم بلوچ سلاء بند تنظیم و سیکیورٹی فورسز آتا نیام ئٹ جھڑپ مسنے۔
اِرا تو مُست جولائی ٹی زیارت و ہرنائی نا مش تا لڑ ئٹی فوج ئنا ڈیفنس ہاؤسنگ اتھارٹی (ڈی ایچ اے) تون تفوک افسر لیفٹننٹ کرنل لیئق مرزا بیگ و اونا سیال ءِ ہم برمتہ کننگا۔ پدان اوفتا جونک خننگار۔ دا تدینی نا ذمہ واری ءِ بلوچ سلاء بند تنظیم ’بلوچ لیبریشن آرمی‘ (بی ایل اے) ارفے۔
دا تدینی آن پد سیکیورٹی فورسز آک کارروائی کریسہ ڈی ایچ اے نا افسر لیفٹننٹ کرنل لیئق بیگ مرزا و اونا کزن نا خون ئٹ تُد نو بندغ ءِ خلنگ نا دعویٰ کریر۔
خلنگ مروک نو بندغ نا چاہنداری مننگ آن گڈ پاش مس کہ او بیگواہ ءُ بندغ ئسر ہرا نا برخلاف بیگواہ آ بندغ آتا خاہوت آک کوئٹہ ریڈ زون آ پنجاہ دے اسکان تولوک برانز ہم کریر۔
تدوکا دے تیٹ بلوچستان نا پولیس نا محکمۂ انسدادِ دہشت گردی (سی ٹی ڈی) نا ڈپٹی انسپکٹرجنرل (ڈی آئی جی) اسہ اعلامیہ اس شنگ کریسس ہرا ٹی دا خلیس نا درشانی کننگاسس کہ سلاء بند تنظیم آتا کنڈ آن تخریبی کارروائی مننگ کیک ہرا ٹی سرکاری افسر آتے برمتہ کننگ نا مننگ کروک تدینیک مننگ کیرہ۔
ضلع ہرنائی ٹی سیکیورٹی آ ساڑی لیویز فورس نا بھلو افسر اس وائس آف امریکہ ءِ تینا پِن ءِ پاش کپننگ نا شڑت آ پارے کہ یک شمبے و دو شمبے نا نیامیکو نن ئنا 12 بجہ آ اوفتے حوال رسینگا کہ فوج ئنا اسہ ہیلی کاپٹر اس تمیسہ بھس مسنے۔
لیویز فورس نا افسر فون آ تران کریسہ ودیک پارے کہ کھوسٹ ئٹ شین لیزہ نا علاقہ ٹی ہندی بندغ آک پاریر کہ ننکان اسہ ہیلی کاپٹر اس مش ئنا ہیپار خننگا و منَہ ساعت آن گڈ اسہ تراک ئسے نا توار بننگا و موڷ بش مس۔
ہندی بندغ آتا پاننگ ءِ ہیلی کاپٹر نا بھس مننگ آن گڈ علاقہ ٹی بھلو کچ اسیٹ سیکیورٹی کارندہ آک گشت کننگ ءُ۔
لیویز افسر نا رد ئٹ یک شمبے نا نن ہرنائی ٹی زردالو نا ہند آ اسہ ٹرک اس خراب مسس، ہراڑان پد اوڑے ٹریفک جام مسس و کیہئ اُلاخ آک گٹ مسوسر۔
اوفتا پاننگ ئس کہ حوال رسینگانے کہ ٹریفک جام نا وخت آ مش تیان سلاء بند بندغ بسوسر و کار اسیٹ سوار اِرا بندغ نا شناختی کارڈ آتے اُراسر۔ منَہ بندغ آتا پاننگ ءِ کہ اوفتے برمتہ کننگانے ولے سرکار نا کنڈ آن دا حوال پک کننگتنے۔
ایلو پارہ غان ٹی بی پی ذرائع آک پک کریر کہ بی ایل اے نا سرمچار آک روڈ ءِ تفیسہ گاڑی تے پٹنگ بنا کریسر۔ اندن کولا دروک ٹرک آتے ہم ٹک کننگا۔
ہرنائی ٹی ہیلی کاپٹر نا تمنگ آن مرگ ئنا گواچی مروکا کارندہ آتا جون تے کوئٹہ ٹی کمبائنڈ ملٹری اسپتال (سی ایم ایچ) آ سر کننگا، پدان اوفتا نمازِ جنازہ ہم خواننگا ہرا ٹی بھلا کوالخواک اوار مسر۔
ایلو کنڈ آن بلوچ سلاء بند تنظیم بلوچ لبریشن آرمی (بی ایل اے) فوج ئنا ہیلی کاپٹر ءِ بھس کننگ ءِ قبول کرینے۔
بی ایل اے نا ترجمان جیئند بلوچ ذرائع ابلاغ نا نمائندہ تے ای میل کریسہ تینا بیان ئٹ پارے کہ بی ایل اے نا سرمچار آک ہرنائی نا علاقہ زردآلو نا خڑک کارروائی ٹی پاکستان نا اِرا سیکیورٹی کارندہ تے دزگیر کرینو۔
بی ایل اے نا رد ئٹ ہرا وخت دا ہڑتوما سیکیورٹی کارندہ آتے دزگیر کننگا پاکستان نا فوج ئنا ہیلی کاپٹر ہموڑے سر مس۔ بی ایل اے نا سرمچار آک ہرنائی ٹی کھوسٹ ئنا خڑک ہیلی کاپٹر ءِ بھس کریر۔