بلوچستان نا بنجائی شار کوئٹہ آن پاکستانی لشکر اسہ ہفتہ ئس مالو ورنا ئسے دزگیر کریسہ نادرست جاگہ آ درینے اندن تدوکا نن ضلع کیچ ئٹ پاکستانی لشکر چھاپہ خلیسہ اِرا خوانندہ ءِ دزگیر کریسہ بیگواہ کرینے۔
شابیتی حوال تا رد ئٹ کوئٹہ نا علاقہ بروری روڈ وحدت کالونی اولی اسٹاپ آن پاکستانی لشکر اسہ بندغ ئسے دزگیر کریسہ بیگواہ کرینے۔
دزگیری آن گڈ بیگواہ مروک ورنا نا چاہنداری امید ولد ولی خان نا پن ئٹ مسونے۔
خاہوت تدینی ءِ پک کریسہ پارے کہ پن کروک ورنا ءِ اسہ ہفتہ ئس مالو پاکستانی لشکر زوراکی ئٹ بیگواہ کرینے۔ خاہوت نا رد ئٹ امید اسہ مزور ئسے ہرا مزوری کریسہ تینا خاہوت ءِ ولفک۔
اوفک بندغی حق آتا ادارہ تیان خواست کریسہ پاریر کہ او امید نا آجوئی کن کڑد ایسری ایتر۔
ایلو پارہ غا تدوکا نن ضلع کیچ ئٹ پاکستانی لشکر چھاپہ خلیسہ اِرا خوانندہ ءِ دزگیر کننگ آن گڈ نادرست جاگہ آ درینے۔
ہڑتوما خوانندہ تے تربت نا علاقہ ڈاکی بازار، آبسر آن زوراکی ئٹ بیگواہ کننگانو۔ ہڑتوما خوانندہ تا چاہنداری سرفراز ولد ایوب و یوسف ولد پٹھان نا پن تیٹ مسونے۔
علاقئی حوال تا رد ئٹ ننکان سئے بجہ غا پاکستانی لشکر چھاپہ خلیسہ ہڑتوما خوانندہ تے زوراکی ئٹ بیگواہ کرینے۔
یاتی مرے تیوہ بلوچستان آن ہڑدے زوراکی نا بیگواہی تا کیس آک رپورٹ مریسہ ءُ۔ برجاء ہفتہ ٹی بلوچستان نا جتاء علاقہ تیان زوراکی نا بیگواہی تا کیس آک رپورٹ مسنو ہراکان پاکستانی لشکر بندغ آتے زوراکی ئٹ بیگواہی نا گواچی کرینے۔