تربت یونیورسٹی کن ہنوکا اِرا خوانندہ بیگواہ

تربت یونیورسٹی نا اِرا خوانندہ زوراکی ئٹ بیگواہ کننگانو اندن پین چار بندغ ءِ ضلع کیچ آن پاکستانی لشکر دزگیر کریسہ بیگواہ کرینے۔

ٹی بی پی نیوز ڈیسک ءِ رسینگوکا حوال تا رِد ئٹ تدوکا دے پاکستانی لشکر ضلع کیچ نا علاقہ تربت آن یونیورسٹی نا اِرا خوانندہ ءّ ہموتم دزگیر کریسہ بیگواہ کرے ہراتم اوفک موٹر سائیکل آ یونیورسٹی کن ہننگ ئسر۔

زوراکی ئٹ بیگواہ مروکا خوانندہ تا چاہنداری ستار، رحیم بخش نا مار و حیات، اسلم نا مار آبسر نا ہندی تا پن آن مسونے۔

اندن اینو ضلع کیچ آن پین چار بندغ قمبر، امید نا مار، عزیز، مولا بخش نا مار، اسد، موسی نا مار و انس، ملا برکت نا مار ءِ پاکستانی لشکر دزگیر کریسہ بیگواہ کرینے۔

دا بندغ تا بارو ئٹ داسکان ہچ وڑ نا حوال رسینگتنے اندن ضلعی کوالخوا تا پارہ غان ہچو ہیت ئس مونا بتنے۔