بلوچستان نا جتاء علاقہ آتیٹ سُم کاری و کسر شکست آتیٹ جمعی وڑ ئٹ اِرا بندغ مرگ نا گواچی و بھاز آک ٹپی مسونو۔
شابیت حوال تا ردئٹ نوشکی گزنلی ٹی زمین تا جیڑہ آ اِرا ٹولی تیٹ جھڑپ آن سُم کاری نا سوب آن اسہ بندغ ئس مرگ نا گواچی و اِرا بندغ ٹپی مسُر۔
ایڑے نوکنڈی کلی زور آباد ٹی نا درست بندغ تا سُم کاری آن حاجی سہراب خان پِنی بندغ ئس بیران مس۔ پولیس کارندہ و بست و بندی کوالخواک جون آتے اسپتال آ دریسہ المّی کاروائی آن گُڈ خاہوت نا دو ٹی تسر ، تدینی نا باروٹ دائسکان پٹ و پول بست و بندی کوالخواک کننگ ءُ۔
ایلو پارہ غان ضلع لسبیلہ ٹی ٹریفک نا اِرا جتاء تدینی تیٹ 9 بندغ ٹپی مسونو۔
لسبیلہ تحصیل کنراج نا علاقہ گجرو پھٹ نا ہند آ مسافر بس چپی مس ہرانا سوب آن ہفت بندغ ٹپی مسُر ہرافک دھدر پروجیکٹ کنراج و وندر ڈیم نا اُلاخ آتیٹ رورل ہیلتھ سینٹر وندر کن دننگار ہراٹی اِرا بھاز ٹپی مروک آتے کراچی کن دننگا۔
پین اسہ شکست ئسے ٹی وندر نا ہند آ ناکہ کھارڑی نا علاقہ ٹی موٹر سائیکل آن تمیسہ اِرا بندغ ٹپی مسُر ہرافک دوا درمان کن اسپتال آ دننگانو۔