کوئٹہ ٹی فزیو تھراپسٹ ایسوسی ایشن نا سروکی ٹی تدوکا دے تیٹ برانز آ تولوک مخلوق آ پولیس کریک ڈاؤن و دزگیری تا بر خلاف دپدرشانی کننگا ہرا ٹی خوانندہ تنظیم تا باسک آک ہم اوار اسر۔
دا وخت آ خوانندہ تنظیم تا باسک آک و فزیو تھراپسٹ آک دپ درشانی کریسہ بلوچستان اسمبلی نا مونا تولوک برانز کریر۔ برانزیکحکومتی نا انصافی و فزیو تھراپسٹ تا خواست آتیکن نعرہ خلکر۔
یاتی مرے فزیو تھراپسٹ ڈاکٹر آک تدوکا کہی تُو تیان کوئٹہ ٹی تینا خواست آتیکن تولوک برانز کننگ ءُ و تدوکا پنچ دے آن او کوئٹہ ریڈزون ئٹ برانز کننگ ءُ۔
تدوکا دے کوئٹہ ریڈ زون ئٹ برانز آ تولوک نرینہ و زالبول فزیو تھراپسٹ تے پولیس بے دادی آن گڈ دزگیر کریسس۔ برانزی تا رد ئٹ پولیسلٹ و کٹ و بے دادی آن فزیو تھراپی ایسوسی ایشن کمیٹی نا اسہ زالبول باسک ئس تُسینگاسس۔
ڈاکٹر آتا پاننگ ئس کہ بلوچستان و ایلو صوبہ تا اسپتال آتیٹ دارو درمان ئٹ زمین و آسمان نا فرخ ءِ۔ بلوچستان آن گیشتر آ ناجوڑ آکچنکا ناجوڑی کن ایلو صوبہ تیا کارہ داٹی ہچو شک ئس اف کہ اوفتے داکان جوان جانجوڑی نا آسراتیک ایڑے رسینگرہ او آسراتی تیٹخاص وڑ ئٹ جانجوڑی نا پڑ تون تعلقداری تخوک پروفیشنل عملہ ہرا ٹی فزیو تھراپسٹ ہرا لس جانجوڑی کن اسہ اہم ءُ کڑد ئس ایسریایتک۔ ولے بلوچستان ئٹ دا شعبہ ءِ حکومت نا کنڈ آن ساندہ خنتے آن چپ کننگک۔
برانزیک دا وخت تینا مُسہ خواست حکومت نا مونا تخانو او خواست آتیٹ غٹ دزگیر مروک فزیو تھراپسٹ تے یلہ کننگ، فزیو تھراپسٹ تابر خلاف آیف آئی آر تا ایسری و ایسوسی ایشن نا خواست آتیا عمل کننگ اوار ءُ۔
اوفک پاریر کہ نن حکومت بلوچستان ءِ پاننگ خوانہ کہ ننا جائز خواست آتے زوت سوبری ئٹ منیسہ ننے تینا لائخی تے ایسری تننگ ناوخت تننگے۔ اگہ ننا خواست آک اِرا دے ٹی مننگتور، گڑا نن بیوس مریسہ بین برانز آ تولون و اگہ دا وخت ئٹ ننے اسہ نسخان ئسرسینگا اونا ذمہ وار حکومت مرو۔