پاکستانی لشکر نا دو آن بیگواہ مروک اِرا ورنا یلہ مریسہ تینا اُرا تے سر مسر۔
شابیتی حوال تا رد ئٹ اسہ سال ئس مالو زوراکی ئٹ بیگواہی نا گواچی سمیع اللہ زہری ولد نصیر احمد زہری تدوکا دے تیٹ آجو مریسہ تینا اُرا ءِ سر مسنے۔ سمیع اللہ نا یلہ مننگ نا پک اونا خاہوت کرینے۔
اندا وڑ تدوکا تُوہ خاران آن زوراکی ئٹ بیگواہ مروک عبدالنبی پنی ءُ ورنا ئس اینو یلہ مسنے۔
یاتی مرے بلوچستان ئٹ زوراکی نا بیگواہی تا تدینیک ہر وخت رپورٹ مریرہ ہرافتیان منہ بندغ یلہ مریسہ پدا بریرہ اندن منہ بندغ ءِ سی ٹی ڈی نا کنڈ آن مونا ہتیسہ دہشت گردی نا دوبہ تیٹ دزگیر کننگ نا دعوی کننگک۔
تدوکا دے تیٹ خاران و کراچی آن دزگیری آن گڈ بیگواہ مروک اِرا بلوچ ورنا ءِ کاؤنٹر ٹیررازم ڈیپارٹمنٹ دہشت گردی نا دوبہ تیٹ دزگیر کننگ نا دعوی کریسس ہرافتیٹ کراچی آن بیگواہ مروک گلشاد بلوچ و خاران آن شفقت یلانزئی اوار ءِ۔
سی ٹی ڈی نا کنڈ آن دزگیر پاش مروک شفقت یلانزئی نا باوہ تینا اسہ بیان اسیٹ پاریسس کہ اونا مار ءِ 23 اکتوبر نا نن گواش روڈ خاران آن اونا ایلو سیال آتون اوار فورسز آک دزگیری آن گڈ بیگواہ کریسر اندن منہ دے آن گڈ مار ءِ پاش کریسہ اونا زی آ دروغ کیس خلنگا۔
برجاء سال 26 ستمبر آ کراچی آن زوراکی ئٹ بیگواہ مروک گلشاد بلوچ ءِ 31 اکتوبر نا دے سندھ آن دزگیر کننگ نا دعوی کریسہ اوڑان سلاء خننگ نا دعوی کننگاسس واہم گلشاد نا خاہوت و بلوچ تنظیم آک سی ٹی ڈی نا دا دوبہ تے دروغ پاریسر۔
بلوچستان ئٹ سی ٹی ڈی نا کارروائی تے راج دوست ٹولیک و بندغی حق آتا تنظیم آک مالو آن شکبر پارہ۔ راج دوست آتا رد ئٹ سی ٹی ڈی ہم پاکستانی ڈھکوک ادارہ تا وڑ بندغ تے بیدس عدالت دزگیر کننگ تون اوار اوفتا خون ئٹ ہم اوار ءِ۔
سی ٹی ڈی داڑان مالو بلوچستان ئٹ زوراکی نا بیگواہی تا گواچی مروک بندغ تے دروغ نا مونتس ئٹ خون کریسہ بسنے۔ تدوکا دے تیٹ کاؤنٹر ٹیررازم ڈیپارٹمنٹ (سی ٹی ڈی) نا اسہ کاروائی ئس دروغ پاننگانے ہراڑے مالو آن بیگواہ مروک چار بندغ ءِ نوشکی ٹی دروغ نا مونتس ئٹ خون کننگا۔
برجاء منہ تُوہ ئٹ سی ٹی ڈی کہی بیگواہ بندغ تے مونا ہیسنے و اوفتا دزگیری ءِ پاش کریسہ اوفتیا دوبہ خلکنے۔