بلوچستان نا ضلع پنجگور و خضدار ئٹ اِرا جتاء جلہو تیٹ قوضہ گیر پاکستانی لشکر و ڈھکوک ادارہ تا ہندی کارندہ تے ٹک کننگ نا ذمہ واری ءِ بلوچ لبریشن آرمی ارفے۔
حوال تا رد ئٹ تدوکا دے پنجگور نا علاقہ بالگتر ئٹ سلاء بند بندغ آک پاکستانی لشکر نا کیمپ آ جلہو کریر، حوالکار آک دعویٰ کریسر کہ جلہو ئٹ پاکستانی لشکر ءِ نسخان رسینگانے۔
ایلو پارہ غا خضدار نا علاقہ چمروک ئٹ اینو نا مروک بمب تراک ٹی اسہ بندغ ئس مرگ ئنا گواچی اندن پنچ ٹپی مسنو۔
علاقئی حوال تا رد ئٹ بمب تراک نا ٹک اسہ کار اُلاخ ئس اس ہرا تراک نا دک ئٹ بس و اُلاخ ئٹ سوار بندغ آک ٹپی مسر۔ حوال تا رد ئٹ پن کروک اُلاخ نا تعلقداری پاکستانی ڈھکوک ادارہ تون مخ تفی کروک ٹولی ڈیتھ اسکواڈ آن ءِ۔
پولیس نا رد ئٹ ٹپی تے سول اسپتال آ سر کننگا، ہراڑے بھاز ٹپی مننگ نا سوب آن اسہ بندغ ئس کسک۔
بلوچ لبریشن آرمی نا ترجمان جیئند بلوچ میڈیا آ شینک کروک بیان اسیٹ پارینے کہ بی ایل اے نا سرمچار آک پنجگور و خضدار ئٹ اِرا جتاء جلہو تیٹ قوضہ گیر پاکستانی لشکر و ڈھکوک ادارہ تا ہندی کارندہ تے ٹک کریسہ دژمن ءِ بھاز نسخان تسر۔
او پارے کہ سرمچار آک اولی جلہو ءِ تدوکا دے پنجگور نا علاقہ بالگتر ئٹ سہاکی چمگ نا ہند آ قوضہ گیر پاکستانی لشکر نا کیمپ آ کریر۔ سرمچار آک ہڑتوم آ پارہ غاتیان راکٹ و ایلو کُبین سلاء تیٹ اسہ وخت آ جلہو کریر، کم و ود بیست منٹ اسکان برجاء مروک دا جلہو ئٹ قوضہ گیر لشکر نا مُسہ کارندہ جاگہ آ مرگ ئنا گواچی و کم و ود چار کارندہ ٹپی مسر اندن دژمن نا اِرا سنگر ہم بھس مسر۔
ترجمان پارے کہ بی ایل اے نا سرمچار آک اینو اسہ پین جلہو اسیٹ خضدار ئٹ چمروک نا ہند آ پاکستانی لشکر و ڈھکوک ادارہ تا جوڑ کروک ڈیتھ اسکواڈ تا اہم کارندہ نائب عبدالغنی و عبدالطیف ءِ مقناطیسی بمب جلہو ئٹ ٹک کریر۔ پن کروک بندغ آک ڈھکوک ادارہ تا سروکی ٹی خضدار و ایب کیب ئٹ قوضہ گیر لشکر تون اوار بلوچ ورنا تا زوراکی ئٹ بیگواہی، فوجی آپریشن تیٹ تُد مننگ تون اوار بلوچ اُلس ئنا ڈغار تیا قوضہ، نشہ بہا کننگ و بندغ تے زر اکن برمتہ کننگ ئٹ اوار اسر۔ پن کروک ٹولی تون تفوک ایلو بندغ تا ہم چاہنداری مسنے ہرافتے زوت اوفتا ایسری آ سر کننگو۔
جیئند بلوچ گڈ سر ئٹ پارے کہ بلوچ لبریشن آرمی دا ہڑتوم آ جلہو تا ذمہ واری ءِ ارفک، قوضہ گیر لشکر و اوڑتون مخ تفی کروک آتیا ننا جلہو آک ترندی تون اوار برجاء مرور۔