بلوچستان نا دارالحکومت کوئٹہ ٹی زورٹ بیگواہی تا خلاف پریس کلب نا مونا وائس فار بلوچ مسنگ پرسنز نا برانزی کیمپ ءِ 4816 پورو مس۔
اینو بی این پی نا راہشون پاکستانی وزیر آغاحسن بلوچ و اوڑتون اوار ایلو باسک آک کیمپ آ بسر خاہوت آتون است اسونی نا درشانی کریر۔
دا وخت تنظیم نا وائس چیرمین ماماقدیر بلوچ پارے کہ زورٹ بیگوائی و بلوچستان آن زالبول تا دزگیری آ ریاست نا ہیت آک ہر وخت دروغ ءُ۔
او پارے کہ پاکستان نا بے دادی تا مرغن مون انگا نن تا تاریخ نا بے حساب چائنداری و نہ چائنداری نا خوفناک ظالم تا کسہ آتیٹ نوشت کروک ءُ، ہراڑے ورنا تا دتر تا پڑیک ریاستی عقوبت خانہ آتا مون انگا زندان تا دیوال تیا یا گلزمین نا مش تیا نقش ءُ دن ءُ پین اخس مون ءُ شام ننا بشخ ئٹی تموک ءُ ہراڑے بلوچ ورنا تا پیشانیک بیدس کوس پاکستانی ریاست نا لوشت سم تا گواچی مریرا۔
او پائے کہ کوئٹہ آن مند اسکان نن بیگواہ بندغ آتا چشوک آ جونک خننگانو و دا لڑ برجاہ ءِ۔
اونا پین پاننگ ئس کہ ڈھکو ادارہ آک سی ٹی ڈی ءِ سلاء اس جوڑ کریسہ بلوچستان ٹی اسہ پوسکنو چم بازی اس بناء کرینو ولے سی ٹی ڈی نا درغ داسا پاش مسونے و دا فورس نا تیوہ آ کاروائیک داڑے ڈھکوک ءُ،او پارے کہ حکومت فوج نا مونا بیوس ءِ ننے ہشار مریسہ تینا بندغ آتے بچفوئی ءِ۔