وائس فار بلوچ مسنگ پرسنز نا کنڈ آن ٹہیفوک بیگواہ بندغ تا خاہوت آتا بین برانزی کیمپ ءِ اینو 4818 دے پوروْ مس۔ مشکے آن سیاسی و چاگڑدی باسک آک کیمپ آ بریسہ خاہوت آتون ہمکوپئی نا درشانی کریر۔
کیمپ آ بروک بندغ آتون ہیت کریسہ وائس فار بلوچ مسنگ پرسنز نا کماش ماما قدیر بلوچ نا پاننگ ئس کہ دا گڑتی ئسے کہ ریاست تینا فوجی مشینری ئٹ بلوچ آتا بروک آ روشن وخت و گواچن آ چاگڑدی تاغت آتے لتاڑنگ ءِ، ہزار آ ورنا تے خون کننگانے ہرافتا جشوک جون تے دوئی کریسہ اینو اسکان بلوچ راج مودہ ٹی ءِ۔
ماما قدیر بلوچ نا پاننگ ئس کہ اینو ہم ہزار تا کچ ئٹ بندغ آک ریاستی زندان تیٹ بند ءُ دا وخت 55 ہزار بندغ بلوچستان آن زوراکی ئٹ بیگواہ ءُ ہرافتیٹ ہمو بندغ آک ہم اوار ءُ ہرا دہ سال آن زندان ئٹ بند ءُ ہرافتے پاکستانی لشکر جتاء علاقہ تیٹ فوجی آپریشن نا وخت دزگیر کریسہ بیگواہ کرینے۔
اونا پاننگ ئس کہ بلوچستان آن زوراکی نا بیگواہی تا پک ءِ قانود ٹہیفوک ادارہ، حکومتی باسک آک و عدلیہ تینٹ کرینے داڑان بیدس بیگواہ بلوچ تے مونا ہتنگ کن غٹ تاغت آک بےسہب مسنو۔
او پارے کہ زوراکی نا بیگواہی تا باروٹ ٹہیفوک حکومتی کمیٹی برجاء تُوہ کوئٹہ ٹی بیگواہ بندغ تا خاہوت آتون اوڑدئی کرو۔
ماما قدیر بلوچ نا پاننگ ئس کہ سردار اختر مینگل نا سروکی ٹی ٹہیفوک کمیشن 15 نومبر آ کوئٹہ ٹی بیگواہ بندغ تا خاہوت آتا برانزی کیمپ نا دورہ کریسہ وائس فار بلوچ مسنگ پرسنز نا راہشون و بیگواہ بندغ تا خاہوت آتون اوڑدئی کرو۔
او پارے کہ برانزی کیمپ نا دورہ نا وخت آ بنجائی سیکرٹری داخلہ، بنجائی سیکرٹری ہیومن رائٹس و سیکرٹری سیکرٹریٹ سینٹ ہم کمیشن نا سروک و باسک آتون اوار مرو۔ ماما قدیر نا پاننگ ئس کہ خاہوت آتے کلہو تننگک کہ او 15 نومبر آ برانزی کیمپ ئٹ ساڑی مریسہ تینا بیگواہ دوستخواہ تا باروٹ شابیتی حوال تے کمیٹی ءِ ایتر۔