بلوچستان نا ضلع خضدار آن پین اِرا بندغ زوراکی ئٹ بیگواہ کننگار، تدوکا بیست و چار گھنٹہ نا نیام ئٹ بلوچستان آن زوراکی ئٹ بیگواہی نا پنچمیکو تدینی رپورٹ مسونے۔
ضلع خضدار نا علاقہ گریشہ نا ہندی ورناک عباس نا مار افضل و علی نا مار نورخان زوراکی ئٹ بیگواہ کننگانو۔
اندن ٹی بی پی ءِ رسینگوک حوال تا رد ئٹ پِن کروک ہڑتما ورنا تے حکومت نا مخ تفوک سلاء بند بندغ آک نن نیمہ آ اوفتا اُرا تیان دزگیر کریسہ تینتون درینو ہراڑان گُڈ اوفتا بابت اسہ وڑ ئنا حوال ئس ہم رسینگتنے۔
یاتی مرے کہ بلوچستان ٹی پاکستانی لشکر و ڈکوک ایجنسی تا منہ سلاء بند جھتہ آتے ٹہیفنگ نا تومت ءِ ہرافتے لَس لوز ئٹ ڈیتھ اسکواڈ پارہ پِن کروک جھتہ آتیا بندغ تا زیا سلاء تیٹ جلہو، زوراکی ئٹ بیگواہی ، زر اکن برمتہ کننگ و نشہ سودا کروک آتون اوار پین اندا وڑ ئنا تومت خلینگانے۔
بلوچستان ٹی تدوکا بیست و چار گھنٹہ نا نیام ئٹی پنج بندغ زوراکی ئٹ بیگواہ کننگانو ہرافتیٹ قلات آن اسِٹ ، پنجگور آن ارٹ و خضدار آن اِرا بندغ اوار ءُ۔