بلوچستان ئٹ خواننگ جاہ تے ہشنگ نا تدینی تا برخلاف بلوچ اسٹوڈنٹس ایکشن کمیٹی تربت نا پارہ غان اینو عطا شاد ڈگری کالج آنشہید فدا چوک اسکان دپدرشانی کننگا۔
دپدرشانی ٹی خوانندہ آتون اوار جتا فکری تپہ آتا بندغ آک بھلو کچ ئسیٹ اوار مسر۔ اوار مروکا دو ٹی بینر و پلے کارڈ ارفیسہ اسکولآتے ہشوک آ تعلیم دشمن آتا برخلاف نعرہ ہم خلکر۔
یاتی مرے داکان مُست ہم بلوچ اسٹوڈنٹس ایکشن کمیٹی نا کنڈ آن اوتھل و شال ئٹ ہم بلوچستان نا جتا علاقہ آتیٹ اسکول آتے ہُشنگنا برخلاف برانزی ریلی اڈ تننگاسس۔
اوفتا پاننگ ئس کہ بلوچستان ئٹی اسہ چم ئسے نا رد ئٹ اسکول آتے چرجوئی ئٹ ہُشنگ ءُ و تعلیم دشمن آتا دا عمل نا بنماسی سوببلوچ ورنا تے تعلیم آن مُر تخنگ ءِ۔
او پاریر کہ دا چم ئنا برخلاف تنظیم ہر تلہ آ جہد کرو۔اوفتا پاننگ ئس کہ تدوکا منَہ تو آن بلوچستان نا جتا علاقہ آتیٹ اسکول آتےہُشیسہ بھس کننگ ءُ۔
یاتی مرے، ضلع کیچ ئنا تحصیل بلیدہ ٹی کلکشان اسکول ءِ خاخر تریسہ بھس کننگا و پسنی نا علاقہ وڈ سر، ریک پشت ئٹی گرلزپرائمری اسکول نا انفراسٹرکچر ءِ ہُشیسہ بھس کننگا۔ اندن کیچ ئنا علاقہ دازن ئٹی خان کلگ ہائی اسکول ءِ ہم خاخر تننگا۔
داڑان بیدس برجاء ہفتہ ٹی وندر نا علاقہ سونمیانی ٹی پرائیویٹ خواننگ جاہ ٹی سی ایف آ شرپسند آک جلہو آن گڈ خواننگ جاہ ءِخاخر تسر۔
دا غٹ تدینی تیان گڈ بلوچ اسٹوڈنٹس ایکشن کمیٹی نا ترجمان تینا بیان ءِ شنگ کریسہ پارے کہ بلوچ خوانندہ تنظیم نا حیثیت ئٹ نن داعمل نا نئے بیرہ مذمت ءِ کینہ بلکہ دا سازشی عمل نا برخلاف عملی بنداو آ جہد ہم کرون۔ ہراکان گڈ بلوچستان نا جتا علاقہ، اوتھل،شال و اینو تربت ئٹ برانز آتا لڑ بناء کننگا۔