بلوچستان نا جتاء علاقہ تیان پاکستانی لشکر نا دو آن زوراکی نا بیگواہی تا تدینیک ہڑدے نا بنیات آ رپورٹ مریسہ ءُ، پاکستانی لشکرپین چار بندغ ءِ دزگیر کننگ آن گڈ نادرست جاگہ آ درینے۔
بیگواہ مروک آتا چاہنداری کریم بخش، نور بخش باہوٹ، سال محمد و نذیر نا پن تیٹ مسنے۔
بیگواہ مروک بندغ تے پاکستانی لشکر تدوکا دے کولواہ آن دزگیر کریسہ نادرست جاگہ آ درینے۔
ایلو پارہ غا حوال آک اریر کہ تدوکا نن خضدار آن بیگواہ مروک ہشتمی جماعت نا خوانندہ ریحان بلوچ ولد محمد جان ہند کٹھانخضدار یلہ مریسہ اُرا ءِ سر مسنے۔
سائرہ بلوچ چاگڑدی حوالکاری ویب سائٹ آ ریحان بلوچ نا یلہ مننگ ءِ پک کریسہ پارے کہ ریحان ءِ یلہ کننگانے۔
او پارے کہ ولے ننے دا ذہنی بے دادی آن انتئے گدریفنگک؟ ہر وخت، ہر جاگہ آ نن دا خیال تون اوار زند گدریفنہ کہ ننتون گڑاس مروئے،اندن سوب سماء اف۔
یاتی مرے سائرہ بلوچ تینا ایلم تا یلہ مننگ کن چار سال آن برانز کننگ ءِ، تدوکا تُوہ سائرہ نا اِرا تاتہ مار ءِ زوراکی ئٹ بیگواہی ناگواچی کننگ آن گڈ سی ٹی ڈی نا کمک ئٹ مونا ہتنگا و تدوکا دے اونا چنک سن آ تاتہ مار ریحان ءِ بیگواہ کننگاسس۔