منہ دے مالو پاکستان نا بنجائی بھلا تلہ (سینٹ) ئٹ ریکوڈک نا بل مونا ہتنگا، ہرانا رِدئٹ بلوچستان ئٹ ریکوڈک نا کوڑ و ایلو مڈی تےبنجاء نا کوالخواہی اٹ تننگا و بیدس شرہ آن دا بل ئنا موْکل تننگا۔ سینٹ ئٹ ریکوڈک بل ئنا موْکل آن مالو بلوچستان اسمبلی ئٹ دا بلئنا حق ئٹ بلوچستان عوامی پارٹی نا حکومت قرار داد امنائی ءِ تس ہراڑا بلوچستان نیشنل پارٹی مینگل و جمعیت علمائے اسلام شرہکریر۔
دا بل ئنا موْکل تننگ نا مسخت حکومت پاکستان و بیرک گولڈ کارپوریشن نا نیامٹ مارچ آن مروک معاہدہ ءِ قانودی دروشم تننگ و معاہدہنا مونا ہڑاند آتے مُر کننگ نا کوشست ئسے۔ سینٹ آن بل ئنا موْکلی آن مالو پاکستان نا سپریم کورٹ، پاکستان نا بنجائی حکومت وبیرک گولڈ کارپوریشن نا نیامٹ معاہدہ ءِ ساف و قانودی پِن کرینے۔
ریکوڈک منصوبہ تینا بناء آن شرہ آتا گواچی مسونے، بلوچستان نا مخلوق ریکوڈک منصوبہ ءِ اسہ لُٹ و پل نا منصوبہ اس سرپد مریک،ہرانا سواد پیشن ملکی کمپنی و پاکستان نا بنجائی حکومت ءِ مرو، ریکوڈک آن مالو سیندک، سوئی گیس تون اوار اخس کہ مڈیبلوچستان آن پیشن مننگو، اوفتا سواد پاش وڑئٹ بلوچ آتا جاگہ غا پاکستان و اونا شریک طاغت آتے رسینگانے۔
پاکستانی راہبند نا ہژدہمیکو ترمیم نا رِدئٹ “صوبہ غاتیان پیشن مروک مڈیک صوبہ نا دوٹی مرور انتیکہ زمین صوبہ نا کوالخواہی ئٹیءِ: ولے ہژدہمیکو ترمیم نا ساڑی مننگ ئٹ ریکوڈک بل ئنا موْکلی صوبائی خودمختاری نا برخلافی نا دروشم ءِ، ہرا بنجائی کُڑدہ غاتا حقآتیا داڑیلی نا ڈول ءِ۔
بلوچستان نا مسکوئی سروزیر نواب اسلم رئیسانی نا پاننگے کہ اِرا ہزار و دوانزدہ ئٹ اونا حکومت دا سوب ایسر کننگا انتیکہ اوریکوڈک معاہدہ آ دستخط کننگ آن نمن مسوسس۔ پیپلز پارٹی ہرا ہژدہمیکو ترمیم نا داد ءِ تینا پن آ کیک، او ہم بلوچستان نا حق آتیاداڑیلی ئٹ پاکستان مسلم لیگ نون نا بنجائی حکومت نا ہمرکاب ءِ۔
بلوچستان نا مخلوق ریکوڈک منصوبہ و ریکوڈک بل نا برخلاف برانز کننگے، بلوچستان نا پارلیمانی جماعت آک و آزاتی نا جہد تونتفوک ادارہ و جماعت آک ریکوڈک منصوبہ نا برخلاف ءُ، بلوچستان نیشنل پارٹی مینگل تیوی بلوچستان ئٹ ریکوڈک بل ئنا برخلاف برانزئنا پڑو کرینے و بلوچ یکجہتی کمیٹی نا راجی حوالکاری تلہ نا کیمپئن ئٹ بلوچستان نا ہر تپہ نا بندغاک ریکوڈک منصوبہ ءِ اسہ لُٹ و پلئنا منصوبہ اس پارینو۔
مارچ ئنا تُوہ ئٹ پاکستان نا بنجائی حکومت و بیرک گولڈ کارپوریشن نا معاہدہ آن گڈ بلوچ آزاتی دوست سلاء بند تنظیم آتا سیوت براستڑی تریسہ پاریسس کہ “ریکوڈک ئٹ بلوچ مڈی نا لٹ پُل کن بیرک گولڈ کارپوریشن نا کوزہ گیر پاکستان تون معاہدہ ءِ نن تیوی نمنکینہ و پامدار کینہ کہ پِن کروک کمپنی ریکوڈک آن مُر مرے نئے تو بلوچ وطن و وسائل نا رکھ اکن براس ایسری گام ارفنگ آن تینےتوپرو۔“
بلوچستان ئٹ ریکوڈک منصوبہ تون اوار اخس ہم منصوبہ بناء مسونو اوفتیان بلوچستان نا خلقت ءِ ہچو سواد اس رسینگتنے، بلکن بےسوادی نا گمان ئٹ ودکی بسونے و خلقت دا منصوبہ غاتا برخلاف تُرند سوختہ خننگک۔ بلوچستان ئٹ بلوچ خلقت نا رضا آن بیدس دامنصوبہ غاتا موْکلی مریسہ کرے گڑا دا منصوبہ تا برخلاف عوامی مزاحمت ئٹ ترندی بننگ نا خُلیس ءِ۔ مُستی دا گڑا نا گمان رد اف کہدا عوامی جوزہ غاتا پاش سواد بلوچ آزاتی دوست جماعت آتے مرو انتیکہ ریکوڈک کوْن انگا معاہدہ غاک، آزاتی خواہوک آتا ہیت آتادرشانی ءِ کیرہ۔