ایرانی سیکورٹی کوالخواک دےکہی بلوچستان نا ہندی اِرا ایڑ ءِ دزگیر کریسہ نادرست جاگہ آ درینو۔
حوال تا رد ئٹ دےکہی بلوچستان نا ہندی اِرا ایڑ غزل پاکزاد و ریحانہ پاکزاد ءِ تدوکا دے قانود ٹہیفوک ادارہ غاک بنجائی شار زاہدانآن دزگیر کریسہ تینتون دریر۔
حوال تا رد ئٹ قانود ٹہیفوک ادارہ تا دو آن دزگیری آن گڈ ہڑتوما زالبول تے نادرست جاگہ آ دننگا اندن دزگیری آن گڈ اوفتا سوشل میڈیاہینڈل تا پروفائل آک ہم بدل کننگانو۔
خُلیس دا پاش کننگک کہ ہڑتوما ایڑ تے ایران ئٹ برجاء حکومت نا برخلاف برانز آتا مُخ تفی ٹی تینا چاگڑدی حوالکاری اکاؤنٹ آتیا موادشینک کننگ نا سوب آن دزگیر کننگانے، واہم ایرانی کوالخواہ تا کنڈ آن دا بارو ئٹ ہچو ہیت اس مونا بتنے۔
یاتی مرے ایران ئٹ برجاء حکومت نا برخلاف برانز آتیٹ اوار مروک کہی شاری تے داکان مالو ہم دزگیر کننگانے، بندغی حق آتا ادارہ تارد ئٹ ایرانی فورسز برانز آتیٹ اوار مروک شاری تے بیر ئنا گواچی کننگے۔
بندغی حق آتا تنظیم تا دعویٰ ءِ کہ برانز آتا بناء مننگ آن گڈ داسکان کم آن کم 14 ہزار بندغ ءِ دزگیر کننگانے، اندن 63 چنا تون اوار کمآن کم 458 بندغ بیران مسنو، شاری تا کہنگ آک کل آن زیات دےکہی بلوچستان ئٹ مسر۔
ایران ئٹ تدوکا سال مہیسا امینی پنی ءُ زالبول نا اخلاقی پولیس نا دو آن دزگیری و خون آن گڈ تیوہ ایران ئٹ برانز آک بناء مسوسر۔مہیسا امینی نا خون ئنا برخلاف برانز آتا لڑ اینو ہم ایران نا جتاء علاقہ تیٹ برجاء ءِ۔