بلوچستان نا اِرا جتاء علاقہ تیان پاکستانی لشکر ہفت ورنا ءِ دزگیر کننگ آن گڈ نادرست جاگہ آ درینے۔
بیگواہ مروک آتیٹ پنچ ءِ نوشکی و اِرٹ ءِ ضلع کیچ آن دزگیر کننگانے۔ نوشکی آن بیگواہ مروک آتیٹ اسہ چنک سن ءُ چنا اس ہم اوار ءِہرا نا چاہنداری خلیل ولد عنایت اللہ ہند قاضی آباد نا پن ئٹ مسنے ہرادے 29 دسمبر آ قاضی آباد روڈ چاغی بس اسٹاپ آن دزگیرکننگ آن گڈ بیگواہ کننگانے۔
داڑان بیدس بیگواہ مروک ایلو ورنا تا چاہنداری سفیان جمالدینی ولد ماسٹر حنیف جمالدینی، نقیب جمالدینی ولد خیر اللہ جمالدینی،عدنان جمالدینی ولد بابو اکبر جمالدینی و مزمل نا پن تیٹ مسنے۔
حوال تا رد ئٹ فورسز آک مزمل و سفیان ءِ بدل کاریز نا ہند آ دزگیر کریسہ بیگواہ کرینو۔ پن کروک ورنا تا زوراکی ئٹ بیگواہی نا وخت آفورسز آک علاقہ ءِ گھیرہ کننگ آن گڈ لاؤڈ اسپیکر آ پڑو کریر۔
داڑان بیدس عدنان جمالدینی و نقیب جمالدینی ءِ احمد وال نا ہند آن ہموتم دزگیر کننگا ہراتم اوفک تینا تیلی آ گاڑی تون دالبندین آننوشکی آ ہننگ اسر۔ فورسز آک تیل آن پُر انگا گاڑی ءِ ہم کوزہ کریر۔
ایلو پارہ غا ضلع کیچ آن حوال آک اریر کہ تحصیل مند نا علاقہ ھوزئی آن پاکستانی لشکر اِرا بندغ ءِ دزگیر کریسہ نادرست جاگہ آدرینے۔
علاقائی حوال تا رد ئٹ تدوکا دے تیٹ سینزدرہ جنوری آ فورسز آک نور بخش پنی ءُ بندغ ئسے نا اُرا غا چھاپہ خلکر و اونا اِرا مار ءِدزگیر کریسہ نادرست جاگہ آ دریر ہرافتا چاہنداری بجار حسن و نوروز نا پن تیٹ مسنے۔