ریاست بلوچ راج ءِ تینا پرامن جہد آن پدی کننگ کپک – ماما قدیر بلوچ

بلوچستان ئٹ زوراکی نا بیگواہی تا برخلاف وائس فار بلوچ مسنگ پرسنز نا برانزی کیمپ اینو 4926 میکو دے کراچی پریس کلب نا مونا برجاء مس۔

دا وخت آ پاکستان کمیونسٹ پارٹی نا جنرل سیکریٹری قاضی امداد، چاگڑدی و بندغی حق آتا باسک نغمہ شیخ و ایلوفک خاہوت آتون ہمکوپئی نا درشانی کریر۔

نغمہ شیخ کیمپ آن ماما قدیر بلوچ تون اوار تینا اسہ عکس اس ٹویٹر آ تریسہ نوشتہ کرے کہ “ماما قدیر بلوچ جہد ئنا ارٹمیکو پن ءِ ہرا کراچی ٹی بسنے و تینا 2013 آن برجاء برانزی کیمپ ءِ ہرا داسکان برجاء ءِ کراچی پریس کلب نا مونا خلکنے، بلوچستان نا و بندغی حق آتا کل آن بھلا معاملہ زوراکی نا بیگواہی تا جنگ ءِ کننگے۔”

او پین پارے کہ نن کراچی نا بندغ آتیان خواست کینہ کہ او ماما قدیر نا کیمپ آ کار و اوڑتون ہمکوپئی نا درشانی کیر۔

تنظیم نا وائس چیئرمین ماما قدیر بلوچ پارے کہ ریاستی بےدادی و کوزہ نا برخلاف بلوچ آتا دا پنچمیکو جہد ءِ ہرا چرجوئی تون برجاء ءِ، پاکستانی ریاست اینو سیاسی و معاشی وڑ ئٹ بھس مسنے، ہراڑا اونا برادر ہمسایہ ملک آک ہم باور کننگ افس، دا ریاست داسا جہان کن اسہ باریم اس جوڑ مسنے، او تینا بیم بش کروک تاغت نا زور آ بلوچ آتے شیف کننگ کتو، بلوچ ڈغار نا آسمان بلوچ وطن نا مڷ آتا دتر آن عطری ءِ۔

او پارے کہ بلوچ راج آ ریاست تینا تیوہ فوجی وسائل تے کاریم ئٹ ہتیسہ تدوکا بےدادی تا تاریخ ءِ پدی اِلانے، ظلم و بیم ئنا گندہ غا مثیل آتے ٹہیفنگے، ریاستی ادارہ غاک تینا تڑی و تاغت ئٹ بلوچ راج ءِ تینا پرامن جہد آن پدی کننگ کپسہ، پاکستان نا غٹ ادارہ غاک، فوج، پرلیمان، نوکر شاہی محکوم راج آتا بربادی ءِ ودی کریسہ اوفتا محکومی ءِ برجاء تخنگ نا کوشست کننگو۔