پاکستان بے قانودی تارکین آتے پدا خواہفے نئے تو ویزا رکھ خلون ایہاتہ – یورپی یونین

یورپی یونین پاکستان تون اوار کیہی ملک آتے خبڑدار کرینے کہ اگہ او تینا بے قانودی تارکین وطن ءِ پدا خواہفتوس گڑا اوفتیا ویزا رکھ خلنگو۔

فرانسیسی حوال تروک ادارہ اے ایف پی نا رد ئٹ سویڈن نا وزیر برائے تارکین وطن پنچ شمبے آ پارینے کہ یورپی یونین نا وزرائے داخلہ تا نیام ئٹ دا ہیت آ امنائی کننگانے کہ تینا بے قانودی تارکین آتے پدا نہ خواہفوک آ ملک آتیا یورپ نا ویزا تا بارو ئٹ رکھ خلنگو۔

دا سخت پالیسی نا دروشم یورپی کمیشن نا سروک ارسلاوان ڈیر لیین نا کنڈ آن پنچ شمبے آ یورپی یونین نا باسک ملک آتا راہشون تے رادہ کروک چٹھی ئسے ٹی خننگانے۔

ارسلاوان ڈیر لیین تینا چٹھی ٹی پاکستان، بنگلہ دیش، مصر، مراکش، تیونس و نائجیریا کون آ ملک آتا ذکر ءِ کرینے۔ دا چٹھی یورپی یونین نا 9 و 10 فروری نا ہمو سروکی مجلس آن مُست رادہ کننگانے ہراٹی دا ویل ئنا زی آ ہیت کننگو۔

ارسلاوان ڈیر لیین پارے کہ یورپی یونین نا باسک ملک آک برجاء سال ئنا اولیکو ششماہی ٹی اسہ پائلٹ اسکیم ئسے آ دستخط کننگ کیرہ تاکن تارکین وطن نا بندغ آتیکن اسکریننگ و سیاسی باہوٹ نا وڑ تے ترند کننگ مرے و ہرا داڑکن لائخی تخپسہ اوفتے زوت واپس کننگ مرے۔

او پین پارے کہ او خواہرہ کہ یورپی یونین خطہ نا رکھوک ملک آتا لڑ تیار کے و بحیرہ روم و دے کہی بلقان نا ہمو کسر تیا سرحدی خیالداری ءِ ترند جوڑ کے ہرافتے تارکین وطن آک یورپ آ ہننگ کن کاریم ئٹ ہتیرہ۔

ارسلاوان ڈیر لیین پارے کہ یورپی یونین پاکستان، بنگلہ دیش، مصر، مراکش، تیونس، و نائجیریا کون آ ملک آتون اوار تارکین وطن نا بارو ئٹ گپ و تران کننگ نا منصوبہ جوڑ کرینے تاکن واپسی نا عمل ءِ جوان جوڑ کننگے۔

ایلو پارہ غا یورپی یونین نا ہوم افیئرز نا کمشنر یلوا جوہانسن پارینے کہ تدوکا سال 10 لکھ ئنا خڑک سیاسی باہوٹ نا خواست آتا رسینگ انگ نا سوب آن کیہی یورپی ملک آتیا بھاز زور ارے۔

او پارے کہ روس ئنا یوکرین تون جنگ آن گڈ 40 لکھ یوکرینی تارکین وطن نا بننگ نا سوب آن ہم یورپی ملک آک ویل آتا گواچی ءُ۔ یورپی ملک آتیا مون کروک بندغ آتا پدا ہننگ نا کچ ئٹی بھاز کمبتی خننگانے۔

سال 2021 ئٹ مُسہ لکھ 40 ہزار و پنچ بندغ ءِ یورپی ملک آتیان واپس ہننگ نا حکم تسوسر ولے اوفتیان بیرہ 21 درسد تینا ملک آتیا پدا رادہ مسوسر۔