پاکستانی لشکر کوئٹہ کلی قمبرانی آن محمد مزمل پنی خواجہ مزمل ولد حاجی محمد حنیف ءِ دزگیر کریسہ تینتون درینے۔
خواجہ مزمل براہوئی بولی نا شاعر ئسے اودے اینو پیشیم نا وخت فورسز آک کلی قمبرانی ٹی اوفتا اُرا غان دزگیر کننگ آن گڈ بیگواہ کریر۔
خیال ئٹ مرے کہ بلوچستان ئٹ زوراکی نا بیگواہی تا وے ایسر مروک آ لڑ دائسکان برجاء ءِ راج دوست کڑدہ تا رد ئٹ بیگواہ مروک آتیٹ بھلا کچ ورنا و خوانندہ تا ءِ۔
بلوچستان ئٹ زوراکی نا بیگواہی تا لڑ بھلو وخت ئسے آن برجاء ءِ ہراڑے منہ بیگواہ بندغ یلہ مریسہ تینا اُرا تیا بسنو واہم بیگواہ بندغ تا یلہ مننگ کن توار ارفوک گل آتا رد ئٹ گیشتر بندغ آک زوراکی ئٹ بیگواہی نا گواچی ہم مسنو۔
بلوچستان ئٹ زوراکی ئٹ بیگواہ بندغ تا یلہ مننگ کن جہد کروک گل ئنا رد ئٹ بلوچستان ئٹ جتاء تپہ تیان تعلقداری تخوک 20 ہزار آن زیات بندغ بیدس عدالت زوراکی ئٹ بیگواہی نا گواچی مسنو ہرافتیٹ بھلا کچ سیاسی خوانندہ و راہشون تا ءِ۔
ایلو پارہ غا بیگواہ بندغ تا خاہوت آتا گل وائس فار بلوچ مسنگ پرسنز نا کنڈ آن بین برانزی کیمپ کراچی پریس کلب نا مونا برجاء ءِ۔