بلوچستان نا ضلع پنجگور ٹی پی ٹی سی ایل نا بست و بند بُھس، بیست و چار دے آن پنجگور نا اِرا ٹیلیفون ایکسچینج تسپ و عیسئی تیوہ وڑ ئٹ بند اندن چتکان ایکسچنج نا اسہ بشخ اس بند ءِ، مخلوق نا ہزار آ لینڈ لائن فون سروس بند، اندن ڈی ایس ایل نیٹ سروس ہم بند ءِ۔
گیشتر حوال تا رد ئٹ کم و ود بیست و چار دے مست پنجگور و تربت نا نیام ئٹی نا درست بندغ آک پی ٹی سی ایل نا ریپیٹر اسٹیشن ءِ خاخر تسوسر، 23دے گدرینگ آن بیدس ہم پنجگور ٹی پی ٹی سی ایل تیا نیٹ ورک ءِ ملینگ کتو، ہرانا سوب مخلوق نا ہزار آ لینڈ لائن فون سروس بند مس و بندغ آک نیٹ سروس آن بے بشخ مسر۔
پنجگور ٹی موبائل کمپنی تا نیٹ سروس مست آن بند ءِ و بندغ آک پی ٹی سی ایل نا نیٹ آ وخت گدرینفنگ ئسر ولے داسا دا ہم بند ءِ مخلوق نا پاننگ ءِ پی ٹی سی ایل ریونیو نا وڑ ئٹ مخلوق آن سال ئنا کروڑ آ رپئی تے ہلینگ ءِ ولے مخلوق ءِ آسراتی تیان بے بشخ کننگ ءِ و سسٹم نا خرابی آن بیدس مخلوق ءِ بل برجاہ رسینگیک ءِ۔ مخلوق خواست کرینے کہ سروس نا ملینگ کن گام ارفینگے۔
ایلو پارہ غان پنجگور ٹی پی ٹی سی ایل نا نیٹ ورک بحالی کن شاری تا برانز عیسئ و چتکان ایکسچنج نا ملینگ کن پی ٹی سی ایل و ڈپٹی کمشنر آفیس نا مونا دپ درشانی کننگا۔
دا وخت برانز کروک آک ہیت کریسہ پاریر کہ پنجگور ٹی تدوکا 24 دے ئنا سے پی ٹی سی ایل نا نیٹ ورک و نیٹ سروس بند ءِ پنجگور ٹی موبائل فون کمپنی تا نیٹ سروس مست آن بند اس بندغ آک پی ٹی سی ایل نا ڈی ایس ایل نیٹ آ وخت گدرینفنگ ئس ولے دا ہم تدوکا 24 دے ئنا سے بند ءِ ولے داسکان داڑا کاریم مننگ اف دا وخت ڈپٹی کمشنر پنجگور ءِ نوشتئی یاد داشت ہم تننگا۔
اندن شاریک خواست کرینو کہ نیٹ سروس ءِ دمدستی وڑ ئٹ ملیر نئے تو نن سی پیک روڈ آ تولوک برانز کریسہ کسر ءِ بند کرون۔