یوکرین نا پاننگ ءِ کہ روس ئنا پوسکنا فضائی جلہو تیٹ کیہی ماڑی تے نسخان مسنے و بیرانی تا حوال ہم ارے۔
کوالخواہ تا رد ئٹ بنجائی شار کییف تون اوار ایلو شار تیا ہم میزائل و ڈرون جلہو کننگانے۔
یوکرین نا کوالخواہ تا پاننگ ءِ کہ دو شمبے نا دے سوب ئنا فضائی جلہو تیٹ روس نیامیکو یوکرینی شار کریوی ریح ٹی کیہئ ماڑی تےٹک کرینے ہرافتیٹ کیہی بندغ بیران و ٹپی مسنو۔
کریوی ریح نا لشکری بست و بند نا موہکش اولیکسینڈر ولکول ٹیلی گرام آ نوشتہ کرے کہ دا جلہو تیٹ پنچ منزلہ ماڑی تے ٹک کننگانے۔
اونا پاننگ ئس کہ ”ایمبولینس سروس کمک کننگ ءِ، اوڑے زیمی مروکا باز بیم ئنا حالیت ئٹی ءُ۔ بھازی آن تموکا ماڑی تا شیف آ بندغآک گھٹ مسنو۔”
اندن علاقہ نا گورنر نا پاننگ ءِ کہ، ”کریوی ریح آ بھلو کچ اسیٹ میزائل تیٹ جلہو مسنے۔”
حوال تا رد ئٹ یوکرین نا بنجائی شار کییف و اسہ پین شار خارکیف ئٹی ہم میزائل و ڈرون تیٹ جلہو کننگانے۔ ہندی لشکری بست و بندنا پاننگ ءِ کہ ” بنداوری حوال تا رد ئٹ دشمن کے ایچ -101/555 میزائل کاریم ئٹ ایسونے۔”
اونا ودیک پاننگ ئس کہ ”کییف ئنا ایب کیب ئنا فضائی سیم ئٹ دشمن نا غٹ جاگہ آتے پٹانون و اوفتے فورسز و فضائی دفاع نا کمکئٹ بھس کرینون۔” اونا پاننگ ئس کہ کییف ئٹی داسکان ہچو جانی یا مالی نسخان نا بابت ئٹ دمدستی حوال دو بتنے۔
ایلو کنڈ آن خارکیف نا ہندی کوالخواہ تا پاننگ ءِ کہ بنداوی حوال تا رد ئٹ اسہ یوٹیلٹی کمپنی سے تون اوار اسہ گودام ئسے نسخانرسینگانے و تراک نا سوب آن خاخر لگانے۔ ایلو علاقہ آتیٹ ہم فضائی الرٹ شنگ کننگانے۔
فضائی جلہو تا دا پوسکنا خبر یوکرین نا کنڈ آن کیہی خلق آتیا دوارہ کوزہ و روسی لشکر نا برخلاف جوابی کارروائی ٹی گامگیج نادعوی آن پد مونا بسنے۔
یوکرین نا صدر وولودیمیر زیلنسکی دو شمبے نا دے تینا تران ئٹ پاریسس کہ دا جنگ سخت ءِ، ولے نن مُستی گام خلنگ اُن و دا باز اہمءِ۔”
روس دا پوسکنا جلہو تا بارو ئٹ داسکان ہچو بیان شنگ کتنے۔