بلوچستان: جوْن دسوک آ زمین
ٹی بی پی سرگپ
بلوچستان پولیس نا کاونٹر ٹیررازم ڈیپارٹمنٹ 30 اگست 2021 آ ڈپٹی کمشنر خضدار و ڈپٹی کمشنر آواران ءِ اسہ چٹی اس رادہ کرے، ہرا ٹی لکھوک ئس کہ ناصر فاروق ولد غلام فاروق ہند محلہ صادق آباد زہری، غلام جان ولد باران ہند بائی پاس کوئٹہ، عبدالقیوم ولد زہری خان ہند زہری خضدار، کمال خان ولد باہوٹ ہند چُکی آواران اسہ پولیس مونتس ئسے ٹی کسفنگانو و اوفتے دہشتگرد پاننگا۔ کاونٹر ٹیررازم ڈیپارٹمنٹ گمانی پولیس مونتس ئٹی کہوکا بندغ آتے بے وارث پاریسہ ایدھی نا ذریعت ئٹ دشت تیرہ میل ئٹی کڈ کرے۔
دشت تیرہ میل ئٹی بے چاہندار آ جون تا اسہ قبرستان اس آبات ءِ۔ سبی روڈ آ ساڑی دا قبرستان ئٹی اِرا سد آن زیات قبر ارے، دا جوْنک مش و گیاوان آتیان بے وارث حالیت ئٹ خننگاسر۔ بلوچ آزادی پسند ڈٹ آک دعویٰ کیرہ کہ پن کروک جون تیٹ گیشتر کچ زوراکی ئٹ بیگواہ مروک بندغ تا ءِ ہرافتیٹ کیہی جونک جشوک حالیت ئٹ اسپتال آ ہتنگرہ و کیہیک دروغ ئنا مونتس آتیٹ خلنگانو۔
اِرا سال مُست بے وارث پاننگوک و کڈ کروک جونک زوراکی ئٹ بیگواہ مروک بندغ آتا ءُ، دا جون تیٹ زہری آن زوراکی ئٹ بیگواہ مروک ناصر جان قمبرانی و نومبر دو ہزار بیست ئٹی حب چوکی آن فرنٹیئر کور نا کارندہ آتا دو آن بیگواہ مروک عبدالقیوم زہری نا پن آ خاہوت آک درست کریسہ اوفتا باوہ پیرئی علاقہ ئٹ کڈ کریر۔
بیست و یکمی کرن ئنا بناء ٹی بلوچستان نا تحریک آجوئی ترندی ئٹ برجاء ءِ و بلوچ آجوئی نا تحریک نا کسر ءِ توننگ کن زوراکی ئٹ بیگواہ مروکا بندغ آتا جشوک جوْن تا دروشم ئٹ خننگ نا لڑ سال 2008 آن بناء مسس ہرا داسکان جتا دروشم تیٹ برجاء ءِ۔ پیپلز پارٹی و مسلم لیگ ن نا دور ئٹی ہزار آ زوراکی ئٹ بیگواہ مروک بندغ آتا جونک جتا علاقہ آتیان جشوک حالیت ئٹ خننگانو۔
عبدالقیوم زہری نا مسڑ زنیرہ کون آ کیہی مسنک دا اومیت آ تولوک ءُ کہ اوفتا بیگواہ مروکا باوہ آک آجو مرور ولے او جون تا دروشم ئٹ بے پن و بے چاہندار آ قبرستان آتیٹ آجو مننگ ءُ۔
پاکستان نا اختیار دار آ ادارہ آک بلوچ نیشنلسٹ آرمی نا گمانی کمانڈر ءِ میڈیا نا مونا ہتیسہ بلوچ ویل ءِ ایسر کننگ نا دعویٰ کننگ ءُ و ایلو کنڈ آن زبیرہ کوْن آ چُنا تیان اوفتا کاٹم نا سیخا ءِ پُلنگ ءُ۔ زوراکی ئٹ بیگواہ مروک بندغ آتا کسفنگ آن بلوچ قومی آجوئی نا تحریک ءِ تاغت رسینگو و الس ئٹ ڈکھ و سوختئی زیات مرو۔