پاکستان و چین 1200 میگاواٹ نا نیوکلئیر پاور پلانٹ نا منصوبہ ’چشمہ فائیو‘ نا جوڑ کننگ کن سئے شمبے نا دے امنائی ئٹ دستخطکریر۔
وزیراعظم شہباز شریف نا ساڑی گری ٹی 4.8 ارب ڈالر مالیت نا دا منصوبہ غا چین ئنا نیشنل نیوکلیئر کوآپریشن اوورسیز کمپنی ناصدر وانگ یونگ جی و پاکستان اٹامک انرجی کمیشن نا بڑزکو واک دار محمد سعید الرحمٰن اسلام آباد ٹی دستخط کریر۔
پاکستان نا سرکاری میڈیا نا رد ئٹ وزیراعظم پارینے کہ حکومت دا منصوبہ ءِ زوت بناء کرو و او ڈیہہ ئٹی چینی سرمایہ کاری نا ستا ءِکرے۔
دا منصوبہ صوبہ پنجاب نا ضلع میانوالی ٹی چشمہ نا ہند آ اڈ تننگو ہراڑے داکان مُست ہم نیوکلئیر پاور پلانٹ ساڑی ارے۔
خبر تروک ادارہ روئٹرز نا رد ئٹ اِرا سال مُست پاکستان ہرا وخت تینا ششمیکو نیوکلئیر پاور پلانٹ نا مون پاشی ءِ کرے تو نیوکلئیرانرجی آن ڈیہہ ئٹی بجلی ودی کننگ نا صلاحیت 1400 میگاواٹ مسس۔
داکان مُست پاکستان نا دریابی شار کراچی ٹی چین ئنا کمک ئٹ پاکستان 1100 میگاواٹ نا نیوکلئیر پاور پلانٹ اڈ تس۔
وزیراعظم نا پاننگ اس کہ دا منصوبہ آ خرچ 2017 نا منصوبہ نا کچ مرو و چینی حکومت پیسہ نا تمنگ آن بیدس خرچ ئٹی تقریباً 30 ارب روپئی یا 10 کروڑ ڈالر نا رعایت ہم تسنے۔
داسکان دا پاش اف کہ دا پاور پلانٹ نا ٹہفنگ پاکستان و چین ئنا نیام ئٹ اقتصادی راہداری ’سی پیک‘ نا 65 ارب ڈالر نا منصوبہ نارد ئٹ مرو یا آخہ۔