ہُچ آتا پٹ و پول کننگ کن ریگستان ٹی ہنوک بندغ نا جون دوئی کننگانے ۔
بلوچستان نا ضلع واشک نا ہندی عبدالعزیز پنی بندغ نا جون ریگستانی علاقہ آن دوئی کننگانے پن کروک بندغ چار دے مالو تینا ہُچ آتاپٹ و پول کننگ کن ریگستان نا پارہ غا پیشتماسس ۔
اینو چار دے آن گڈ اونا جون ءِ دوئی کریسہ بست و بند نا ذریعت ئٹ اسپتال آ دننگا ہرادے المی کاروائی کننگ آن گڈ خاہوت ءِ تننگا ۔
ہندی بست و بند نا ردئٹ عبدالعزیز ولد حاجی سمال محمد حسنی نا تعلق واشک نا علاقہ دھمگ سینکوری آن ءِ اندن بوڑکو ریگستانٹی زیات باسنی و ملاس مننگ نا سوب آن او بیران مسونے ۔
خاہوتی ذرائع تا ردئٹ عبدالعزیز نا پٹ و پول درو آن بناء ئس اینو 2 بجہ ننے فون ئنا زریعت ئٹ حوال رسینگا کہ اونا جون بوڑکو ناریگستان ٹی دوئی کننگانے اندن جون نا حالیت بھاز خراب مسونے ۔