بلوچستان آن چرجوئی تون فوجی آپریشن، اُرا تیا چھاپہ، زوراکی نا بیگواہی، دروغ ئنا مونتس و برانز تا احوالک مونا بریرہ، واہم پن کروک تدینی تیان اسہ بھلو کچ اس رپورٹ مفک۔ ہرافتیٹ مُر ئنا علاقہ تیٹ احوالکاری آسراتی مفننگ تون اوار حکومتی تلہ غا دا تدینی تے مونا ہتپننگ اوار ءِ۔
ٹی بی پی نا کچ و حساب نا ردئٹ برجاء سال شش تُوہ ئنا وخت ئٹ تیوہ بلوچستان ئٹ فوجی آپریشن، چھاپہ و کسر تے بند کننگ نا لڑک برجاء مسر، دا کاروائی تیٹ پاکستانی فوج، پیرا ملٹری فورس فرنٹیئر کور، سی ٹی ڈی، ڈھکوک ادارہ، پولیس و ایلو سلہہ بند ادارہ غاک اوار مسنو۔
دی بلوچستان پوسٹ نا ویژول اسٹوڈیو نا دا انفوگرافکس ئٹ 2023 نا اولیکو شش توہ ئٹ بلوچستان ٹی پاکستانی لشکر نا کاروائی تے نشان تننگانے۔ تدوکا شش توہ ئنا وخت ئٹ پاکستانی لشکر نا کاروائی تیان بلوچستان نا 42 علاقہ زیمی مسر۔
کاروائی تیٹ تیوہ غاتیان زیات زیمی علاقہ تیٹ تربت ئٹ 40 کاروائی، بولان ئٹ 36، پنجگور ئٹ 33، خضدار ئٹ 30، قلات ئٹ 20، کوئٹہ ئٹ 17، تمپ ئٹ 14، نوشکے ٹی 11 و مستونگ ئٹ 11 کاروائی کننگا۔
پاکستانی لشکر برجاء سال شش تُوہ ئنا وخت ئٹ بلوچستان ٹی 361 کاروائی کرے، ہرافتیٹ 149 چھاپہ، 113 کسر تے بند کننگ و 99 فوجی آپریشن اوار ءُ اندن دا آپریشن آتیٹ کیہی دے تے اسکان علاقہ تا ناکہ بندی اوار ءِ دن کہ بولان نا علاقہ تیٹ 20 دے اسکان ناکہ بندی خننگا۔
پن کروک چھاپہ تیٹ گمانی وڑ ئٹ مناسب قانودی ڈول کاریم ئٹ ہتنگتو، زیمی مروک آتا ردئٹ فورسز آک نن ئنا نیمہ غا اُرا تا دیوال تیان درکیسہ اُرا تیٹ ساڑی زالبول و چنا تیا بے دادی کریر و ورنا مار تیتون اوار پیر انگا تے دزگیر کریسہ نادرست ہند آتیا سر کننگا اندن کیہی کاروائی تیٹ آباتی تا نیام ئٹ اُرا تیا مارٹر گولہ ہم خلنگا۔
اندا وڑ فوجی آپریشن آتیٹ زالبول و چنا تے اسپر ئسے نا دروشم ئٹ کاریم ئٹ ہتنگ و دزگیر کننگ نا تدینی تیتون اوار نرینہ تا بیدس قانودی خون تا تدینیک ہم رپورٹ مسر اندن شار تیتون اوار خلق و کسر تیا ناکہ بندی تیٹ زیمی مروک آتے خُلیفنگ نا شکائست آک ہم مونا بسر۔
توئی بنداو آ مروک چھاپہ، فوجی آپریشن و ناکہ بندی تا دروشم ئٹ کاروائی تیٹ جنوری ٹی 40، فروری ٹی 50، مارچ ئٹ 65، اپریل ئٹ 59، مئی ٹی 51، جون ئٹ 71 کاروائی رپورٹ مسر۔
*دا معلومداری تے کیہی رپورٹس آتیا جوڑ مروک ڈیٹا و ٹی بی پی نا وس ءِ پامداری ٹی تخیسہ اُننگے۔