قلات: بیگواہ بندغ تا یلہ مننگ کن برانز، کراچی کوئٹہ کسر بند

بلوچستان نا ضلع قلات نا تحصیل منگچر نا ہند آ بیگواہ نوید لانگو، شاہان بلوچ، قذافی نیچاری، کفایت نیچاری و محمد حسن نا خاہوت آک تینا دوستخواہ تا یلہ مننگ کن تولوک برانز کریسہ کوئٹہ کراچی کسر ءِ ہن و بر کن بند کرینو۔

خاہوت آتا پارہ غان کسر ءِ سہب ئنا ہفت بجہ نا وخت آ بند کننگانے، برانز نا وخت بیگواہ نوید بلوچ نا ہیڑ میڈیا نمائندہ تیتون ہیت کریسہ پارے کہ نوید احمد لانگو ءِ 15 اپریل 2015 آ منگچر بازار آن فورسز کارندہ غاک تینتون دریر ہرا دائسکان بیگواہ ءِ و اونا بابت ہچو حوال اس رسینگتنے۔

او پارے کہ ننا غٹ بیگواہ بندغ تے یلہ کریسہ اوفتے عدالت ئٹ ہتنگے تانکہ نن دا اذیت و تکلیف آن آزات مرین۔

او گیشتر پارے کہ اگہ ننا بندغ تے عدالت آتیٹ مونا ہتنگپک گڑا کم آن کم ننے اوفتا بابت معلومداری تننگے و ننا بندغ تے ننتون ہیت کرفر تانکہ ننا اُست آتے جارات رسینگے۔

برانز نا وخت بیگواہ شاہان بلوچ نا مسڑ تران کریسہ پارے کہ کنا باوہ ءِ 2022 ئٹ فورسز کارندہ غاک بیگواہ کریر۔ نن تینا باوہ نا یلہ مننگ کن کیہی وار برانز کرین و سڑک آتیا دھکہ کنگن ولے ہچ اس متو۔

او پارے کہ کنا باوہ تون اوار بیگواہ بلوچ بندی تے یلہ کریسہ عدالت آتیٹ مونا ہتنگے یا ننے تینا بندغ آتیتون فون آ ہیت کرفنگے تانکہ ننے تسلی مرے۔

یاتی مرے اِرا تُوہ مُست 21 مئی 2024 آ ہم بیگواہ شاہان بلوچ، کفایت اللہ نیچاری، نوید بلوچ، و قذافی نیچاری تون اوار ایلو بیگواہ بلوچ آتا یلہ مننگ کن منگچر نا ہند آ خاہوت آک برانز کریسر۔ ہراڑے حکومتی تلہ نا بندغ تا پارہ غان اوفتے باوری کرفنگاسس ولے اوڑا دائسکان عمل درآمد مننگ کتنے۔