بلوچستان نا ضلع آواران ئٹی فوجی آپریشن برجاء ءِ، و آواران و کوئٹہ آن فورسز آتا دو آن چار بندغ زوراکی ئٹ بیگواہ مننگ نا حوال رسینگانے۔
شابیتی حوال تا رد ئٹ تدوکا دے پاکستانی فورسز آک آواران نا علاقہ لباچ زیارت ڈن ئٹی چھاپہ خلِسا مُسہ بندغ ءِ دزگیر کرینو۔ و اینو سہب ئنا مالو پاکستانی فورسز آک آواران نا علاقہ پیرندر زیلگ ءِ گھیرہ کرسا آپریشن بناء کرینو۔
حوال تا رد ئٹ فورسز آک بھلو کچ اسیٹ پن کروک علاقہ ٹی ساڑی ءُ، و اُرا اُرا ءِ پٹنگ ءُ۔ وا ہم اینو برجاء آپریشن نا وخت آ ہچو وڑ ئنا دزگیری یا بیرانی نا حوال رسینگتنے۔
تدوکا دے آواران آن بیگواہ مروک آتا چاہنداری کماش دینار، زباد ولد سخی داد و داد بخش ولد علی محمد نا پنا مسنے۔
حوالکار تا رد ئٹ بیگواہ مروک آ دراسکی نا ہندی ءُ ہرافتے فورسز آک زور ئٹ ہمپ و لڈ کننگ آ بیوس کریسر و او انداڑے رہینگنگ ئسر ہرافتے درو پاکستانی فورسز آک چھاپہ خلسا دزگیر کرینو۔
خیال مرے کہ بیگواہ مروکا کماش دینار ءِ داکان مُست گیارہ فروری 2020 آ نن نیمہ غا آواران نا علاقہ تیرتیج ئٹی چھاپہ خلسا اونا اِرا مار محمد علی و واحد تون اوار دزگیر کریسر ہرافتیٹ علی محمد ءِ دزگیری ٹی فورسز آک کسفیسر۔
اندا خاہوت آن تعلقداری تخوک نصیر ولد بائیان نا جون توتک نا اشتماعی قبر آتیان خننگاسس، ہرادے 2013 ٹی پاکستانی ڈھکوک ایجنسی تا کارندہ آک دزگیر کریسر۔
ایلو کنڈ آن بیگواہ غا بلوچ آتا آجوئی کن کاریم کروک تنظیم وائس فار بلوچ مسنگ پرسنز نا پاننگ ءِ کہ کوئٹہ آن آواران نا ہندی خوانندہ اعظم ولد اللہ داد ءِ پاکستانی فورسز آک بے قانودی دزگیر کننگ آن گڈ بیگواہ کرینو۔