پنجاب ئٹی بلوچ خوانندہ و گوادر یونیورسٹی لاہور
ٹی بی پی اداریہ
پاکستان نا قومی اسمبلی پوسکنو یونیورسٹی جوڑ کننگ نا بیست و چار بِل اسہ جاگہ آ پاس کرینے، ہرافتیٹ پاک-چین گوادر یونیورسٹی ہم اوار ءِ، ہرا لاہور ئٹی جوڑ کننگو۔ بلوچستان ئٹی دا وخت آ ہژدہ یونیورسٹی ءُ، ہرا بیرہ لاہور شار ئٹی ساڑی یونیورسٹی تیان ہم کم ءُ، غٹ آن متکن آ بلوچستان یونیورسٹی مالی نیستی تا گواچی ءِ و ایلو یونیورسٹیک ہم مالی و بست و بندی ویل آتا گواچی ءُ۔
بلوچستان نا خوانندہ آک چرجوئی ئٹ برانز کننگ ءُ کہ بلوچستان ئٹی پوسکنو یونیورسٹی جوڑ کننگ مرے ولے بلوچستان ئٹی یونیورسٹی اڈ تننگ نا جاگہ غا پاک-چین گوادر یونیورسٹی ءِ ہم لاہور ئٹی جوڑ کننگ ءُ و ایلو کنڈ آن ہرا منَہ بلوچ خوانندہ پنجاب نا یونیورسٹی تیٹ خواننگ ءُ، اوفتا فیصل آباد، بہاولپور، ملتان و لاہور نا یونیورسٹی تیٹ پروفائلنگ و زوراکی نا بیگواہی تا تدینی تیٹ ودکی مننگ ءِ۔
برجاء دے تیٹ قائد اعظم یونیورسٹی نا اِرا بلوچ خوانندہ ءِ اسلام آباد آن زوراکی ئٹ بیگواہ کننگا، پنجاب یونیورسٹی لاہور نا خوانندہ سالم بلوچ تربت آن زوراکی ئٹ بیگواہ کننگا و ایرڈ ایگریکلچر یونیورسٹی راولپنڈی آن 17 سالی خوانندہ فیروز بلوچ نا زوراکی نا بیگواہی ءِ اسہ سال اس گدرینگانے و عدالتی پنت آتیان بیدس و داسکان آجو مننگ کتنے۔ اسلام آباد ہائی کورٹ پاریسس کہ پنجاب نا یونیورسٹی تیٹ بلوچ خوانندہ آتا پروفائلنگ و زوراکی نا بیگواہی تے بند کننگ مرے ولے خوانندہ آتا بیگواہیک داسکان برجاء ءُ۔
بلوچ قوم پرست آک پاکستان آ دوبہ خلیرہ کہ استحصالی ڈٹ چین پاکستان اقتصادی راہداری نا سوب آن بلوچ قوم نسل کشی و آبادیاتی تبدیلی تون مون تننگ ءِ و دا نا سواد آتے پنجاب ارفنگ ءِ، بلوچستان ئٹی فوجی آپریشن مننگ ءِ و پنجاب ئٹی میٹرو و یونیورسٹی جوڑ مننگ ءِ۔
پاکستان نا ذمہ وار تاغت آک بلوچستان تون اسہ محکوم ئسے نا وڑ سلوک کننگ بند کیر و بلوچ زمین تون تفوک ڈٹ آتے ہم بلوچستان ئٹی جوڑ کیر۔ بیرہ ہیت آتیان بلوچستان نا بندغ آتے ریفنگ کننگ مفک، بلوچ قوم چرجوئی ئٹ دا منصوبہ تیا فریشانی نا درشانی کننگ ءُ و ایسکان بلوچ نا ڈغار آ ڈٹ آتا سواد آک بلوچ قوم ءِ رسینگپسہ ایسکان بلوچستان ئٹی دا ڈٹ آتا ایسری منکن اف۔