جنگ
نوشت: سارنگ بلوچ
دی بلوچستان پوسٹ
بندغ تا بیگواہ مِننگ، خون مِننگ و خاہوت آتے اذیت تنِنگ داسکان ہچ ئس اف بلوچ قوم ءِ دا ایت ءِ سرپند مروئی تمو کہ دا ناپاک ریاستجنگ ئنا وڑ ءِ پُہہ مفک۔
براہوئی نا پنی آ شاعر مرید بلوچ پائک:
”نہ جنگ ئس آب ئنا چائِک نہ دود ئس نئے کہ عزت ءِ
دنو کم ظرف و خن شیفو خدا دشمن تے دشمن تِف“
بلوچ اینو جنگ زدہ ءِ و بلوچ نا مونا اسہ خنزیر ریاست ئسے۔ پنی آ شاعر علی نوان نا شاعری ئسے:
“بیدار مبو یاراک ننا خنزیر تو جنگ ئے“
بلوچ بیگواہ آ بندغ تا ویل ہمو وخت اسکان ایسر منِنگ کپک ہرا وخت اسکان بلوچ اسہ آجو ریاست اس مف اسکان بیگواہی آن ہمگیشتر خرابو پین ویل ودی مروئے و لمّہ ایڑ تا آبر ہم خؤندی مفرو۔
انت کہ ویل ئس اینو بلوچ قوم مون کنِنگے داتا سوب غلامی ءِ و ایسری تا جنگ ءِ۔
بلوچ لیڈر بشیر زیب پائک کہ:
” دا جنگ زورئٹ ننا زی آ ہتنگ مسنے، دا جنگ ننے ہیس دا جاگہ غا سر کرے و دا جنگ ءِ گُڈَی ایسر نن کرون“
اینو بلوچ ڈغار نا کنڈ کنڈ ارا ارا اذیت تے سگنگ ءِ بلوچ نا دتر دیر آن ام ارزان وہنگ ءِ و دادے ایسر جنگ کنِنگ کیک۔ دنیا ٹی مظلوم وظالم نا ہچو سیالی ئس متنے، جنگ مسنے و تاریخ ننے پائک کہ مظلوم آک سرسوب مسنو۔ مظلوم قوم آک جنگ نا کسر آن اسہ آزات ءُزند ئسے آ سر مسنو۔
اسہ ویڈیو سے ٹی بلوچ لیڈر چیئرمین بشیر زیب پائک:
“امن جنگ نا پِھڈ آن ودی مریک“
جنگ ہمو کسر ءِ ہراڑان لمہ تا دیدغاک رکھنگ مریرہ، ایڑ تا ایلم و باوہ ظلم نا آماچ آن رکھنگ منِنگ کیرہ۔
براہوئی نا پنی آ شاعر ابصار بلوچ نا شاعری سے:
“امن ئس بکارءِ ابصار گڑا آب نا مرے جنگ
دتری مرے مچ زمین بے حسابنا مرے جنگ“
نن سرپند مرین کہ احتجاج کنگ مرے، نوشتہ کار آک نوشت کیر قوم نا بےوسی، ڈکھ و ظلم آتے، دنیا ٹی بلوچ نا تیوہ حوال ءِ ام سر کنگمرے، سفارت کاری ہم مرے ای دا گڑا تے آن اختلاف کپرہ ولے مسئلہ دادے کہ ننے ہفتاد سال آن ہم گیشر وخت مسنے نن انت دوئیکرین دا عمل تے آن؟ دا عمل تے آن بلوچ قوم نا اخس جیڑہ ایسر مسنو؟ نن وختس دیخہ دا گڑا تے جیڑین گڑا ننے اسہ ورندی ئس ملّیک“ہِچ“
دا باروئٹ مرید بلوچ نا شاعری سے:
“تقریر تحریر ام احتجاجاک الم مریرک
چاہک زبان ے تلوار نا دا استان دپیس“
تاریخ ننے پائک کہ جنگ نا ورندی جنگ مسنے، قوماک جنگ کرینو بِیرہ بلوچ قوم دا ظلم نا آماچ اف کہ نن دا شک ٹی مرین کہ دنیا نااولی تھیوری آ نن عمل کنِنگ ہن ننا کسر پاش ءِ ع ورناک ساہ تسنو، ورناک چھنڈ چھنڈ کریر تینے، ایڑ ننا اینو مش تے ٹی دژمن نا موناسلوکو تینا قوم کن تینا قوم تون ظلم نا برخلاف اینو دژمن ءِ ورندی ایتنگو، نن سرپند مرین کہ اوفک دلیل ایترہ اوفک جنگ نا قوم نا آجوئیو ظلم نا برخلاف دلیل ئٹ ہیت کیرہ، نن تو انت دلیل ارے کہ جنگ مف؟
مرید بلوچ نا شاعری سے:
جنگ جنگان جان ءِ ننا چُٹیفک
سنگت نوید و سنگت مقبول نا دتر اینو چہانٹ کنگ و پانگو کہ بیدس دا کسر آن نن تون پین کسر اف، بیدس تینا دتر ءِ تنگ آن نن تونپین ہچ کسر اف، اسہ ورناس جندر منِنگ کن تینا مارشت تے گھٹو کیک و تینا جند نا خاہوت و زند نا قربانی تننگے، دا اندا ورنا کو ہرابلوچ نا زند، لمہ او ایڑ تا ڈکھ آتے خننگ آن پد جندندر مریرہ و دژمن نا مونا اسلمی کُوک خلیرہ۔
سنگت زاکر مجید پائک کہ:
لُمہ وطن دِتر خوائک
ننا دِتر ءِ ام خوائک ، دشمن نا دِتر ء ام خوائک۔
دا ہیت آک پاش ءُ کہ نی ہمو وخت اسکان درد، ڈکھ خنوس کہ نی خنزیر ریاست تن ناحق نا بشخ ئسے اُن، نا اندا ریاست آن حق ناامیت یا خواست کنِنگ ویز معصومیت او منافقت آن پینش اف۔
نن جہانی ادارہ تے آن خواست کینہ، پاکستان نا عدالت آ تے آن امیت کینہ ولے نن دا ہیت ءِ گِیرام کینہ کے 77 سال مسنے ہرا عدالت آننے انصاف ملانے، اینو اخس کہ بیگواہ آجو مسنے گڑا و خاہوت نا جہد نا ٹکی اوفتے ملانے۔ بلوچ ءِ دا عدالت و ڈیہہ آن ہچ ئس دو بفرونئے کہ بسنے پاکستان نا پارلیمینٹ آن۔
چئیرمین بشیر زیب پائک کہ اندا پارلیمینٹ نا بندغ آک تینٹ پارہ کہ ننا ہیتے کس بننگ اف، ننے کوالخوائی اف کہ نن گڑاس کین، تواسہ کنڈان پارہ کہ کوالخوائی اف ایلو کنڈان پاکستان نا آئین او انصاف نا ہیت ءِ کیرہ گڑا داڑے ہم دا ہیت پاش ءِ کہ بلوچ نا دژمن ناودی کروکا منافق آکو ہرا قوم ءِ اندا ناپاک ریاست ٹی تیوہ زند تینا زاتی حاجت کن غلام تخنگ خورا۔
ای اسہ بلوچ لس مخلوق نا حثییت ئٹ نما مونا دا تاریخی اصلیت ءِ پاننگ نا حاجت سرپند مریوا کہ بلوچ ءِ انتئے انصاف و حق نا حاجتمرے قوضہ کروک ریاست نا مونا؟ بلوچ تینا ڈیہہ ئنا خواجہ ءِ، خواجہ امر حق نا ہیت کیک؟ خواجہ بیرہ آجوئی خواہک، ای تینا ہیت آتےبیگواہ، انصاف یا پین وڑٹ اندا سبب آن بیان کریٹ کہ ننا پین ہچو ویل ئس اف نن غلام اُن و حل تا بیرہ آجوئی ءِ۔
جنرل اسلم پائک کہ بلوچ تون ہر گڑا ارے، قدرت بلوچ ءِ تسنے ولے نن لائخ مرین، و بشیر زیب بلوچ پائک کہ اینو بلوچءِ بیگواہ کننگو یابلوچ لس مخلوق نا انت کہ چاگڑدی ویل ءُ اوفتا سوب غلامی ءِ ولے نن پُہہ مرینہ کہ جنگ ہمو کسر ءِ کہ بلوچ نا قل ویل آک حل مننگکیرہ۔
گڑا نما سوچ ٹی دا سوال ودی مرو کہ جنگ آن بربادی مریک و جنگ آن زِیانی مرو، دا قل راست او ولے اگہ دتر ہم تفن، امن ہم خواہن داامر منِنگ کیک؟ اینو دنیا ٹی اخس ام ترقی یافتہ قوم اریر او قل جنگ آن سرسوب منِنگ آن پد دا منزل آسر مسنو، ہمو اینو بندغی حقآتا بادشاہ ءُ ولے وختی ءُ جنگ خنانو، جنگ کرینو، ظلم آتا گواچی مسنو گڑا سرسوب مسنو۔
جنگ انت کن الم ءِ؟ مرید بلوچ نا شاعری ئس:
جنگ ضروری ءِ سیم آتا رکھ پال ئکے
جنگ ضروری ءِ گپ آ تیکے گال ئکے
جنگ ضروری ءِ دود و ثقافت ئکن
جنگ ضروری ءِ راجی معیشت ئکن
جنگ ضروری ءِ پگہ نا نسل آتیکے
جنگ ضروری ءِ مون ئنگا فصل آتیکے
جنگ ضروری ءِ دا تینا بولی ئکن
جنگ ضروری ءِ چوگان و ہولی ئکن
جنگ ضروری شناخت و بقا کن ارے
جنگ ضروری اُرا و چُنا کن ارے
جنگ تورِک نہارآتے ڈیہہ آن دا
جنگ رُژن ئس اتیک نوک و دے آن دا
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔