زوراکی ئٹ بیگواہ آصف و رشید بلوچ نا بیگواہی ءِ پنچ سال پوروْ مننگ آ اوفتا خاہوت نا پارہ غان 29 اگست آن 31 اگست اسکان پاکستان نا بنجاہی شار اسلام آباد ئٹ مُسہ دے ئی برانزی کیمپ اس ٹہفنگو اندن 31 اگست آ بیگہ نا 4 بجہ غا دپدرشانی اس کننگو۔
خاہوت نا ردئٹ آصف و رشید نا زوراکی ئٹ بیگواہی ءِ 31 اگست 2023 آ پنچ سال پوروْ مرو، دا نیام ئٹ نن اوفتا رکھ یلہ کننگ کن ہر مننگ کروک کوشست ءِ کرین ولے اوفتے یلہ کننگپک۔
اوفک پاریر کہ زوراکی نا بیگواہی آن گڈ اوفتا جعلی دزگیری ءِ پاش کننگانے۔ اوفتیتون اوار دزگیر مروک اوفتا ایلو سنگت آک یلہ مسر آصف و رشید نا بابت ننے اینو اسکان ہچو معلومداری تننگپک، اوفتا دا وڑ نا بیگواہی خاہوت کن اذیت ئسے۔
خاہوت نا پاننگ ءِ کہ آصف و رشید نا یلہ مننگ کن 29 اگست 2023 آ بنجاہی شار اسلام آباد پریس کلب نا مونا مُسہ دے ئی کیمپ اس خلنگ آن گڈ 31 اگست بیگہ نا 4 بجہ غا دپدرشانی اس کننگو۔
31 اگست 2018 آ پاکستانی لشکر نوشکے ئٹ زنگی ناوڑ پکنک آ ہنوک دئے بندغ ءِ دزگیر کریسس، فورسز آتا پارہ غان پن کروک بندغ تا دزگیر ئٹ عکس آک ہم شینک کننگار اندن میڈیا غا دا بابت احوال ہم تننگا۔
واہم پدان پن کروک بندغ تے بیگواہ کننگا۔ بیگواہ مروک ایلوفتے اِرا سال نا نیام ئٹ جتا وخت آتیٹ یلہ کننگا اندن اوفتیتون اوار بیگواہ مروک آصف و رشید بلوچ دائسکان بیگواہ ءُ۔
بیگواہ آصف و رشید نا یلہ مننگ کن اوفتا خاہوت کوئٹہ، کراچی، اسلام آباد ئٹ تینا برانز آتے ریکارڈ کرفینے اندن دا بابت بیگواہ بندغ تا کمیشن ئٹ ہم ہنانے واہم اوفتا دوستخواک دائسکان یلہ کننگتنو۔
یاتی مرے 31 اگست آ زوراکی نا بیگواہی تیان زیمی مروک آتا جہانی دے نا ردئٹ وی بی ایم پی نا سروکی ٹی کوئٹہ ئٹ بیگواہ بندغ تا ویل آ اسہ دے ئی سیمینار اس اڈ تننگو۔
وائس فار بلوچ مسنگ پرسنز سیمینار نا مہمان خاص بلوچستان نیشنل پارٹی نا سروک سردار اختر مینگل مرو اندن سیمینار نا سروکی ءِ وی بی ایم پی نا کماش نصراللہ بلوچ کرو۔