بلوچستان نا ضلع کیچ، مشکے و سندھ ئنا بنجاہی شار کراچی آن پاکستانی لشکر نا دو آن مُسہ بندغ زوراکی ئٹ بیگواہ کننگانو۔
استو پاکستانی لشکر ضلع کیچ نا تحصیل مند ئنا علاقہ کسٹم بازار نا ہند آ چھاپہ خلیسہ باوہ و مار ءِ زوراکی ئٹ بیگواہی نا گواچی کریسہ نادرست ہند آ درے۔
ہندی حوالکار تا پاننگ ءِ کہ فورسز آک علی اکبر و اونا مار محمد جان ءِ بے دادی نا گواچی و دزگیر کریسہ نادرست ہند آ دریر۔ پدان فورسز آک علی اکبر ءِ ہلار، واہم اونا مار محمد جان دائسکان بیگواہ ءِ۔
آواران نا تحصیل مشکے آن حوال آک رسینگانو کہ مُسہ و چار جون ئنا نیامیکو نن پاکستانی لشکر اسہ بندغ ئسے دزگیر کریسہ بیگواہ کرینے، پن کروک ورنا نا چاہنداری عید محمد نا مار ابراہیم نا پن ئٹ مسنے، ہرا دائسکان مونا ہتنگتنے۔
ہندی حوالکار تا پاننگ ءِ کہ پن کروک بندغ مشکے نا علاقہ گجلی نا ہندی ئسے ہرافتے 2018 ئٹ پاکستانی لشکر باوہ پیرئی علاقہ غان زوراکی ئٹ ہمپ و لڈ کرفیسہ گجر ئٹ رہینگ آ بیوس کرے، اندن داسہ اودے زوراکی ئٹ بیگواہ کننگا۔
ایلو پارہ غان کراچی آن پاکستانی لشکر نا کارندہ غاک درے ننکان لیاری سنگولین حیدری ہوٹل نا ہند آ اسہ اُرا ئسے آ چھاپہ خلیسہ جنریٹر مستری عبدالعزیز نا مار عبداللہ ءِ دزگیر کریسہ بیگواہ کرینے۔
ہراڑان گڈ او بیگواہ ءِ۔ خاہوت اونا یلہ کننگ نا خواست کرینے۔