بلوچستان نا ضلع مستونگ ئٹ عید میلاد النبی جلوس آن خڑک گمانی وت کش تراک ئٹ کم آن کم 50 آن زیات بندغ کسکنو اندن درزن آتیان زیات ٹپی ءُ۔
تراک آن گڈ پولیس و ایلو فورسز آک ہمو جاگہ غا سر مسر و ناکہ بندی کریسہ کمکی کارروائی بنا کریر۔
ڈسٹرکٹ ہیلتھ آفیسر مستونگ رشید محمد سعید پک کرینے کہ بلوچستان نا ضلع مستونگ نا الفلاح روڈ آ ٹہیفوک مدینہ مسیت آن خڑک تراک ئٹ کم آن کم 52 بندغ دائسکان کسکنو اندن درزن آ بندغ آک ٹپی مسنو۔
کہوک آتیٹ ڈی ایس پی نواز گشگوری ہم اوار ئس۔ تراک ہمو وخت مس ہراتم 12 ربیع الاول نا ردئٹ جلوس ٹی اوار مننگ کن بندغ آک مُچ مسوسر۔
پولیس نا ردئٹ تراک نا حالیت خودکش مننگ نا خُلیس ءِ، ہرا نا ٹِک دا جلوس ئس ولے دائسکان ہچو ٹولی اس دانا ذمہ واری ءِ ارفتنے۔
داڑان مالو نگراں احوالکاری وزیر چاگڑدی احوالکاری تلہ ایکس (ٹوئٹر) آ بیان ئٹ پاریسس کہ ٹپی آتا کچ 40 اسکان ءِ اندن کہوک آتا کچ ئٹ ودکی مریسہ ءِ۔ او دتر تننگ نا خواست کرے اندن کوئٹہ نا اسپتال آتیٹ ایمرجنسی ٹہفنگانے۔
نجی نیوز چینل آتا ردئٹ جمعہ غا مستونگ نا ضلعی بست و بند اسہ بیان اسیٹ پارے کہ تراک ئٹ اسہ ڈی ایس پی اس ہم کسکنے۔