بلوچستان نا ضلع کیچ آن پاکستانی لشکر مُسہ بندغ ءِ زوراکی ئٹ بیگواہ کرینے۔
بلوچستان نا ضلع کیچ نا علاقہ بلیدہ ٹی پاکستانی لشکر سہب ئنا مالو چھاپہ خلک زالبول و چنا تیا بیدادی کریسہ ارا بندغ ءِ دزگیر کریسہ بے ڈس ءُ ہند ئسے آ درے۔
حوال آتا رد ئٹ بلیدہ نا علاقہ میناز محمد نا ہند آ پیر بخش پنی ءُ بندغ ئسے نا اُرا غا فورسز آک سہب ئنا مالو چھاپہ خلیسہ پیر بخش نا اسہ ورنا ءُ مار ئسے تون اوار ارا بندغ ءِ بے گواہ کریر۔
بے گواہ مروکا بندغ تا چاہنداری نسرم ولد پیر بخش و پذیر ولد غنی نا پن ئٹ مسنے۔
حوالی نا پاننگ ءِ چھاپہ نا وخت آ فورسز آک اُرا ٹی ساڑی چنا و زالبول تے بھاز بیداری نا گواچی کریر۔
اندن پن کروک ہڑتوما ورنا تے دزگیر کریسہ بے ڈس ءُ ہند ئسے آ دریر۔
ایلو پارہ غان حوال آک رسینگانو کہ پاکستانی لشکر درو کیچ نا تحصیل تمپ نا علاقہ دازان آن عبدالحق ولد عبدالحفیظ پنی ءُ ورنا ئسے زوراکی ئٹ بے گواہ کرینے۔
یاتی مرے پن کروک ورنا نا تاتہ مار اسد بلوچ ہرا مارچ 2014 ئٹ بلوچستان نا بنجاہی شار کوئٹہ آن پاکستانی ڈھکوک ادارہ تا دو آن بے گواہ کننگاسس ہرا دائسکان بے گواہ ءِ۔