اسرائیل و فلسطین نا اڑینگ
ٹی بی پی سرگپ
ہفت اکتوبر آ حماس نا سلہہ بند کڑدہ عزالدین القسام بریگیڈ نا کمانڈر محمد ضیف اسرائیل نا برخلاف طوفان الاقصٰی آپریشن نا پڑو کرے، القسام بریگیڈ نا دوانزدہ سد جنگجو غزہ – اسرائیل نا سیم آ رکھوک واڑ ءِ کیہی جاگہ غاتیان نقب خلیسہ جاندمی اسرائیل ئٹ فوجی چھاؤنی تیا بھلو کچ اسیٹ جلہو کریر، ہرا اسرائیل و جہان ءِ گوڑیفے۔ نوزدہ سد ہفتاد و دو نا کپور دے آ شام و مصر نا اسرائیل آ جلہو نا پنجاہ سال آن پد اولیکو وار داخس بھلو کچ ئسے آ جنگ بش مسنے۔
القسام بریگیڈ نا جلہو ئٹ اسرائیل نا سینزدہ سد آن زیات فوجی و لس شاری کسکر، ہراڑان گڈ اسرائیلی فوج غزہ نا پٹی آ وے ایسر مروک بمب جلہو تا لڑ ءِ بنا کرے، ہرا ٹی دائسکان اِرا ہزار آن زیات بندغ کسکنو ہرافتیٹ بھلا کچ چنا و زالبول تا ءِ۔ اقوام متحدہ نا ردئٹ اسرائیل نا آسمانی جلہو تیٹ اونا یانزدہ باسک مرگ ئنا گواچی مسنو و ریڈ کراس نا ترجمان نا پاننگ ءِ کہ اسرائیلی فوج پیرامیڈکس و اسپتال آتے ٹک کننگ ءِ ہرافتیٹ کیہی پیرامیڈکس آک کسکنو اندن جرنلسٹ ود آؤٹ بارڈر نُہہ فلسطینی صحافی تا کہنگ نا پڑو کرینے۔
ہیومن رائٹس واچ نا پاننگ ءِ کہ اسرائیل نا لشکر غزہ و جاندمی لبنان ئٹ پیہن فاسفورس بمب آتے کاریم ئٹ ہتنگ ءِ۔ اسرائیل نا مُسہ لکھ و شست ہزار پیادہ لشکر بکتر بند گاڈی، ٹینک و توپ خانہ آتیٹ غزہ ءِ گھیڑ کریسہ لشکر کشی کن تیاری کننگ ءِ و کسر تے بند کننگ وخت آ شار تے اسکان خوراک، پاٹ و دیر کون آ الّمی آ گڑا تے سر کننگ نا موکل تننگ افس۔
جہان نا جتا مسلمان ڈیہہ تا سروک آک و او جاگہ غاتا جماعت آک فلسطین تون ہمکوپئی کن توار بڑز کننگ ءُ، ولے ہمو حق آتے تینا ڈیہہ تیٹ راج آتے تننگ افس۔ ترکی غزہ ئٹ بمباری نا ترند مخالفت کننگ ءِ ولے ایلو پارہ غان شام و عراق ئٹ آجوئی کن کاریم کروک کرد آتیا آسمانی بمباری کننگ ءِ۔
بلوچستان ئٹ زنک ایسری آ چُپ مروک آک فلسطینی تا لس خون آ برانز کننگ ءُ۔ پاکستان ئٹ اسرائیل آپریشن آ نغد کاری و حماس نا مزاحمت نا ستا ءِ کروک آک تینا ہمسایہ بلوچ راج نا مزاحمت ءِ لتاڑنگ کن فوجی آپریشن نا مُخ تفی ءِ کیرہ۔
اِرا ریاستی حل آن بیدس فلسطین و اسرائیل نا جنگ اندا وڑ برجاء مرو۔ جہان نا اثر دار آ ڈیہک جنگ ءِ ایسر کننگ کن عملی گام ارفر انتئے کہ فلسطین نا ویل ءِ ایسر کننگ آن بیدس نیامی دے ٹک ئٹ ایمنی ہتنگ ممکن اف۔ اقوام متحدہ نا قراداد آتا ردئٹ و جہانی قانود آتے کاریم ئٹ ہتنگ آن ہی فلسطین و اسرائیل ئٹ کشت و خون ءِ ایسر کننگ مریک۔