سفر خان مری ءِ 14 سال مالو 26 اکتوبر 2009 آ ریاستی ادارہ غاک کوئٹہ آن زوراکی نا بیگواہی تا گواچی کریر۔
سفر خان مری نا خاہوت نا ردئٹ 26 اکتوبر 2009 آ سفر خان مری سہب ئنا عارف گلی سریاب روڈ کوئٹہ ئٹ اسہ تعمیراتی ٹھیکہ ئسے آ کاریم کننگ ئس کہ اسہ پیہن گاڑی اسیٹ پاکستانی ڈھکوک ادارہ تا کارندہ غاک اودے دزگیر کریسہ بیگواہ کریر۔
خاہوت نا پاننگ ءِ کہ ہمو دے آن ہلیس اینو اسکان سفر خان مری نا بابت اونا خاہوت ءِ ہچو معلومداری اس رسینگتنے۔
اوفک پاریر کہ سفر خان مری نا پیر انگا لُمہ دائسکان تینا مار اکن ودار کننگ ءِ۔ سفر خان نا خاہوت سیاسی جماعت و بندی حق آتا ادارہ تیان خواست کرینے کہ او 14 سال آن بیدس راہبند زندان آتیٹ بند سفر خان مری نا یلہ مننگ کن توار بڑز کیر۔