لاہور ئٹ پنجاب یونیورسٹی آن سادہ پُچ بینوک بندغ آک خوانندہ ءِ زور ئٹ تینتون دریر، میڈیا غا ویڈیو تالان۔
اینو پنجاب یونیورسٹی نا گیٹ نمبر 4 آن سادہ پُچ بینوک بندغ آک یونیورسٹی ٹی خوانوک فرید بلوچ ءِ زوراکی ئٹ بیگواہ کریر۔ فرید بلوچ بلوچستان نا علاقہ کوئٹہ نا ہندی ئسے ہرا پنجاب یونیورسٹی ٹی ماسٹرز کننگ ءِ۔
پن کروک تدینی نا ویڈیو فوٹیج چاگڑدی احوالکاری تلہ تیا تالان مس ہرا ٹی خننگک کہ منہ سلہہ بند بندغ آتیتون اوار پنجاب پولیس نا وردی ٹی اسہ بندغ اس بلوچ ورنا ءِ زور ئٹ اسہ کار اسیٹ تولفنگ ئٹی ءِ۔
فوٹیج ئٹ خننگ مریک کہ بلوچ ورنا برمتہ کروک آتیان تینے رکھنگ کن مزاحمت کننگ ءِ اندن دا برمتہ کروک آک ورنا ءِ بے دادی نا گواچی کریسہ گاڑی ٹی تولفرہ و تینتون دیرہ۔
ہموڑے خوانوک خوانندہ تا ردئٹ فرید بلوچ ءِ سلہہ بند بندغ آک تینتون درینو ہراڑان پد فرید بلوچ نا بابت اونا سنگت آتے ہچو احوال اس تننگتنے خُلیس ءِ کہ فرید بلوچ ءِ ایلو بلوچ خوانندہ تا ڈول زوراکی نا بیگواہی تا گواچی کننگانے۔
یاتی مرے پنجاب نا جتا علاقہ خاص وڑ ئٹ لاہور و اسلام آباد آن داکان مالو ہم کیہی بلوچ خوانندہ تے دزگیر کننگ آن گڈ زوراکی ئٹ بیگواہی نا گواچی کننگانے ہرافتیٹ بیبرگ امداد بلوچ نا تدینی پاش ءِ ہرادے پنجاب یونیورسٹی آن پاکستانی ڈھکوک ادارہ تا کارندہ غاک برمتہ کریسہ تینتون اوار دریسر و اونا ویڈیو فوٹیج ہم مونا بسوسس۔
اندا وڑ پنجاب نا شار راولپنڈی آن سال 2022 ئٹ زوراکی ئٹ بیگواہ فیروز بلوچ دائسکان مونا ہتنگتنے اندن دا نیام ئٹ بلوچ خوانندہ تے بھیم نا گواچی کننگ و دزگیری تا تدینیک ہم چرجوئی ئٹ مونا بریسہ کرینو۔
اینو زوراکی ئٹ بیگواہ فرید بلوچ نا بیگواہی نا بابت چاگڑدی احوالکاری تلہ آ بلوچ گل و خوانندہ غاک ترند ردعمل نا درشانی کننگ ءُ، پنجاب ئٹ خوانوک بلوچ آتا پاننگ ءِ کہ جامعہ پنجاب ئٹ چیف سکیورٹی بلوچ خوانندہ تے بھیم نا گواچی کننگ، خوانندہ تا پروفائلنگ و فرید بلوچ نا سلہہ بند بندغ تا دو آن برمتہ مننگ نا ذمہ وار ءِ۔