بلوچستان نا ضلع کیچ نا علاقہ تربت ٹی سلہہ بند بندغ آک پولیس تھانہ آ جلہو کریسہ پولیس کارندہ تون اوار چار بیدس ہندی مزور کار آتے مرگ ئنا گواچی، اسٹ ءِ ٹپی کننگا۔
پولیس نا ردئٹ سئے شمبے نا نن چار بجہ آ نا درست بندغ آک تربت نا ایب کیب علاقہ ناصر آباد ٹی سم کاری کریسہ چار بیدس ہندی بندغ و اسہ پولیس کارندہ ئسے مرگ ئنا گواچی کریر ۔
مرگ ئنا گواچی مروک آتیٹ محمد عظیم ولد ظفر علی ہند مظفر گڑھ پنجاب، شہباز ولد غلام رسول ہند مظفر گڑھ پنجاب، باقر علی ولد شیر محمد ہند مظفر گڑھ پنجاب، شھزار احمد ہند مظفر گڑھ پنجاب اوار ءُ اندن مرگ ئنا گواچی مروک پولیس کارندہ نا چاہنداری عطا جان ولد محمد اسلم ہند نودز تربت آن مسونے ۔
سم کاری آن اسہ بندغ ئس مدثر ولد شیر محمد ہند ڈی جی خان ٹپی کننگا ہرادے پولیس کارندہ آک ٹیچنگ ہسپتال تربت آ دننگا۔
تدینی نا حوال دوئی کننگ آن گڈ ایس ایس پی محمد بلوچ نا پنت آ پولیس نا ٹولی ہند آ رسینگیسہ شاہد آتے مُچ کرے و ڈوہدار تا پٹ و پول ءِ بناء کننگا۔
تدوکا دے تیٹ تربت شار نا سیٹلائیٹ ٹاؤن ٹی بیدس ہندی بندغ تیا اسہ ساہ ہلوک جلہو ئس کننگا ہرانا ذمہ واری ءِ بلوچستان تون تفوک جتائی دوست گل بلوچ لبریشن آرمی ارفیسہ پاریسس کہ ننا سرمچار آک انٹیلیجینس بیسڈ کاروائی ٹی کوزہ گیر پاکستانی لشکر نا 6 کاریمی آ کوزہ لشکر نا کیمپ آ ہننگ بننگ ئٹ و دژمن نا گاڑی تیٹ سوار مننگ آ ہم خننگانو۔
اونا پاننگ ئس کہ پن کروک کارندہ آک دروشم بدل کریسہ کوزہ گیر پاکستانی لشکر کن مخبری و بلوچ دژمن کاریم تیٹ اوار مروک ئسر، ہرا پن ئنا ڈیتھ اسکواڈ کارندہ آتے جا ہم تننگ ئسر۔