بلوچستان نا ضلع کیچ ئٹی نادرست آ بندغ آک گچین کاری تا آزات اومیت وار نا اُرا ءِ بمب جلہو ئٹ ٹک کریر، و سوراب ئٹ سلہہ بند بندغ آک سم کاری کرسا جمعیت علماء اسلام نا اسہ باسک ئسے کھسفیر۔
بمب جلہو نا تدینی کیچ ئنا علاقہ مند بلوچ آباد نا ہند آ مس، ہراڑے درو ننکان نادرست آ بندغ آک فدا حکیم پنی ءُ بندغ ئسے نا اُرا ءِ بمب جلہو ئٹ ٹک کریر۔
فدا حکیم نا بارو ئٹ ہندی مخلوق نا پاننگ ءِ کہ پن کروک بندغ نا تعلقداری ہمو ٹولی تیان ءِ ہرافتے سرکاری مخ تفی تُد ءِ، ہرافتے لس بولی ٹی ڈیتھ اسکواڈ پاننگک۔ جلہو ئٹ نسخان تا بارو ئٹ شابیتی حوال داسکان مونا بتنے۔
ایلو کنڈ آن بلوچستان نا علاقہ سوراب ئٹ نادرست آ بندغ آک سم کاری کرسا جمعیت علماء اسلام نا باسک حاجی عبدالحمید مینگل ءِ کھسفیر۔
سم کاری نا تدینی چھڈ گدر ئٹ مدرسہ نا رہا مس۔
یاتی مرے کہ تیبہ بلوچستان ئٹ گچین کاریک خڑک مننگ تون اوار اومیت وار تے ٹک کننگ نا چرجوئی برجاء ءِ۔ تدوکا دے تیٹ نادرست آ بندغ آک نیشنل پارٹی نا اومیت وار و مسکوہی وزیر لالا رشید نا قافلہ ءِ ہم دشت ئنا ہند آ ٹک کریسر۔
داکان مُست مسلم لیگ (ن) ئنا اومیت وار اسلم بلیدئی ءِ ہم تربت ئٹ نادرست آ سلہہ بند بندغ آک سم کاری کرسا ٹپی کریر۔
بلوچ مسلح گل آتا سیوتی براس ہم الس آن گچین کاری تیٹ بشخ وے ہلنگ نا خواست کرینے۔