بلوچ یکجہتی کمیٹی نا کنڈ آن 28 جولائی آ گوادر ئٹ “بلوچ راجی مُچی” اڈ تننگ نا پڑو آن گڈ تنظیم نا کنڈ آن راجی مُچی نا تیاری تیٹ ترندی ہتنگانے۔
بی وائی سی نا کنڈ آن راجی مُچی نا بارو ئٹ چاہنداری تننگ کن بلوچستان نا جتا علاقہ آتیٹ مجلس اڈ تننگ تون اوار وال چاکنگ، پمفلٹ بشخنگ و چاہنداری مننگ ءِ۔
بی وائی سی نا کنڈ آن چاگڑدی حوالکاری میڈیا غا پاننگانے کہ بلوچ راجی مُچی نا تیاری تیکن یکجہتی کمیٹی جھالاوان ریجن ئٹی جتا علاقہ آتیٹ بی وائے سی نا سنگت آتون اوڑدئی کننگانے۔ دا دورہ بی وائی سی نا کنڈ آن خضدار، نال و سوراب ئٹ بلوچ راجی مُچی نا کاریم تیکن کارنر میٹنگ، وال چاکنگ و موبلائزیشن کن تینا سنگت آتا ٹولی جوڑ کننگانے۔
بی وائے سی نا کنڈ آن دا ہم پاننگا کہ بلوچ یکجہتی کمیٹی حب ریجن ئٹ درو یک شمبے نا دے گڈانی ٹی اسہ چاہنداری مجلس ئس اڈ تس۔ ہرا ٹی بی وائے سی نا باسک آک بلوچ راجی مچی و بلوچ سیوتی کن گڈانی نا الس تون اوڑدئی کریر۔
اندن گڈانی نا بنجائی بازار ئٹ اسہ پر امن پیدل مارچ ئس کننگا ہراٹی 28 جولائی آ گوادر ئٹ بلوچ راجی مچی ٹی اوڑدئی نا خواست کننگا۔ ایسر ئٹ گڈانی نا جتا ہند آتیا وال چاکنگ کننگا۔
اندن بلوچ راجی مُچی نا رد ئٹ شال ئتون اوار گوادر و کیچ ئٹ ہم مجلس اڈ تننگا۔ کیچ ئنا جتا ہند آتیٹ مجلس آن بیدس وال چاکنگ کننگانے و پمفلٹ ہم بشخنگانے۔
اندا بابت ئٹ اینو شال ئنا کلی ہدہ ٹی مجلس ئٹ تننگا۔ مجلس ئٹ بلوچ راجی مُچی نا خواست ئنا رد ئٹ مخلوق ءِ چاہنداری تننگا و اوفتیان خواست کننگا و دا راجی مُچی ٹی اوار مرسا تینا راجی ذمہ واری تے پورو کیر۔