نظم
اموتم گُڑا جنگ لازِم مریک
مزدک مہر
ہراتم سفا گُلزمین تَل مرے
ہراتم کہ افلاک نا شَل مرے
نا لمبَہ ٹی ہر کُنڈ آ جنگل مرے
پِنا پین انا ڈوک و ہر خَل مرے
اموتم گُڑا جنگ لازِم مریک
نی ھینار زاتی آ دریاب اٹی
امیری آ ڈیھ غم تا گڑدآب اٹی
جنوزان آ ہدہ نی سریاب اٹی
مریس گر مدامی نی کریاب اٹی
اموتم گُڑا جنگ لازِم مریک
نا سیاسر تا پلّو تیا دُو بٹِر
نا لج ءِ میار ءِ ھو خن ٹی تِخر
نا کوپہ تے زیبا غا روڈ آ تَڑِر
نا زندہ غا جونے ھو زندہ ہُشِر
اموتم گُڑا جنگ لازِم مریک
چرک آتا نیام اٹ نا گُلشن مرے
لوار آتا گواچی نا چلتن مرے
دتر ٹی چڑہ دیدہ نَم خَن مرے
چِوا سخت آجو نا دیدَن مرے
اموتم گُڑا جنگ لازِم مریک
ہرا تم نا ٹپ آتا باہ ے ملِر
نے ظُلم آتا چَرخ آتٹی ھو گڑِر
نا دیدہ تے نُسخل تِٹی ھو سغِر
نا زیل آتے سو آن اگہ ھو شنِر
اموتم گُڑا جنگ لازِم مریک
ہراتم جہلئو تو بریر غیر انا
کہلئو تے ننے آ اتیر غیر انا
ہراتم زبان آک تینا ولے
نا ہیت آک و گپ آک مریر غیر انا
اموتم گُڑا جنگ لازِم مریک
ہراتم نی پلویڑ اٹی زُوم انا
نا پہچان ءِ داڑے گہ محکُوم انا
نا سرمایہ کاری مرے شُوم انا
نا شانُتل مرے باٹی گہ بوم انا
اموتم گُڑا جنگ لازِم مریک
ہرا تم عدَل ٹی نا سردار مف
نا گُفتار اٹی اِچ نا کِردار مف
نا آباد گُواڑخ تا گُلزار مف
امن نا اے گُوگُو تا کوکار مف
اموتم گُڑا جنگ لازِم مریک
ہرا تم نا دزگیر مڑدَک مرے
دتر ٹی اسِٹ نا دا جؤرَک مرے
اگہ بے گواہ لا پتا یا شہید
نا غَمخوار آ دا یار مزدَک مرے
اموتم گُڑا جنگ لازِم مریک