بلوچستان نا بنجاہی شار کوئٹہ غان پاکستانی لشکر چار بندغ ءِ دزگیر کریسہ بیگواہ کرینے، اندن آواران آن اِرا بندغ آجو مسنو۔
بیگواہ کننگوک آتا چاہنداری محمد دین نا مار صہیب لانگو، محمد بخش نا مار وقاص، نثار احمد و امجد بلوچ نا پن تیٹ مسنے۔
دافتیٹ صہیب لانگو ءِ کلی اسماعیل آن اندن وقاص ءِ ہدہ منو جان روڈ آن دزگیر کننگ آن پد بیگواہ کننگانے۔ اندن داڑان مالو 21 جولائی آ یک شمبے نا دے امجد بلوچ پنی ءُ ورنا ئسے ہم پاکستانی لشکر پی ٹی سی ایل کالونی جی پی او چوک کوئٹہ غان زوراکی ئٹ بیگواہی نا گواچی کرینے۔ اندن بیست و دو جولائی آ پاکستانی لشکر کوئٹہ غان نثار احمد پنی ءُ بندغ ئسے دزگیر کریسہ بیگواہ کرے ہراڑان پد او بیگواہ ءِ۔
داڑان بیدس بلوچستان نا ضلع آواران پیراندر لوپ آن اسہ سال اس مالو پاکستانی لشکر نا دو آن بیگواہ کننگوک اِرا ورنا موسیٰ نا مار دیدگ و صاحب داد نا مار اختر درو آجو مریسہ تینا اُرا تے سر مسنو۔
موسیٰ نا مار دیدگ ءِ پاکستانی لشکر 7 نومبر 2023 آ برمتہ کریسہ بیگواہ کریسس و صاحب داد نا مار اختر ءِ 29 نومبر 2023 آ پاکستانی لشکر بیگواہ کریسس ہرا درو آجو مسنو۔