کسر آ تولوک برانز کریسہ تینا بندغ آتا آجوئی نا خواست کرون۔ خاہوت آک
شابیتی حوال تا ردئٹ بلوچستان نا ضلع خضدار نا تحصیل زہری آن پاکستانی لشکر نا پارہ غان زوراکی ئٹ بیگواہ کننگوک 9 بندغ نا خاہوت آک اوار مریسہ 28 فروری آ کوئٹہ کراچی کسر ءِ تیوہ وڑئٹ جتا ہند آتیا بند کننگ نا پڑو کرینو۔
دا وخت آ زوراکی ئٹ بیگواہ بندغ آتا خاہوت آک بلوچ یکجہتی کمیٹی آن خواست کرینو کہ اوفک کسر آ تولوک برانز ئٹ اوفتیتون ہمکوپئی کیر و اوفتا برانز ئٹ اوار مریر۔
یاتی مرے پاکستانی لشکر و ڈھکوک ادارہ غاک تدوکا توہ جنوری ٹی زہری نا جتا علاقہ تیان کیہی بندغ آتے دزگیر کریسہ تینتون دریسر ہرافتیٹ اسہ بندغ اس آجو مسنے واہم کیہی تے دائسکان مونا ہتنو۔
پن کروک بندغ آتیٹ محمد انور نا مار مجیب الرحمن بوبک 9 جنوری، عبدالقادر نا مار عتیق الرحمن بوبک 13 جنوری ملگزار خضدار، محمد عمر نا مار محمد حیات مٹازئی 18 فروری زہری ڈاک رحیم آباد، دین محمد نا مار حافظ سراج احمد پندرانی ہند نورگامہ زہری، عبدالحمید موسیانی نا مار زاہد احمد 10 اکتوبر 2022، سردار دودا خان اسٹیڈیم زہری، گل محمد موسیانی نا مار یاسر احمد 5 جون 2023 ہند بلبل زہری، سعداللہ نا مار زکریا 30 اگست 2021، پنجگور، عبدالرشید موسیانی نا مار نوید احمد 29 اپریل 2023 ہرادے پیر عمر خضدار نا ہند آ ویگن آن دڑفنگا، محمد حیات نا مار محمد شفیق جتک 31 اگست 2022، گدان ہوٹل خضدار آن زوراکی ئٹ بیگواہی نا گواچی کننگاسس۔
بیگواہ بندغ آتا خاہوت آتا پاننگ ءِ کہ اگہ اوفتا بندغ آک 27 فروری اسکان آجو کننگتور گڑا اوفک 28 فروری آ بنجاہی کسر ءِ جتا ہند آتیان بند کرور و برانزی تحریک نا کچ ءِ پین شابیت کرور۔
خاہوت آک بندغی حق آتا تنظیم و بلوچ یکجہتی کمیٹی آن خواست کرینو کہ او اوفتا برانز ئٹ اوار مریسہ زوراکی نا بیگواہی تا برخلاف توار بڑز کیر۔