پلویڑ ئٹ بلوچستان – ٹی بی پی سرگپ
بلوچستان آ چَٹی کروک متنازعہ حکومت نا فیصلہ غاک الس ءِ ملوک جیل اسیٹی بدل کرینو۔ انٹرنیٹ و موبائل نیٹ ورک کون آ بنداوی آسراتیک وختی آن بند ءُ، و داسہ سفری رکھ آک، بینک و بازار آتا زوراکی ئٹ بند کننگ زند ءِ خوار کرینے۔ لس بندغ اِرغ، درمان و پوریا کون آ بنداوی حق آتیکن رُلیک، اندن مقتدر کڑدہ تا سیاسی دروشم زمینی گواچنی ءِ منّنگ نا جاگہ غا میڈیا ئٹ بیرہ شان تروک بیانیہ جوڑ کننگ ئٹ اختہ ءِ۔
متنازعہ سر وزیر آزاتی نا جشن ئنا مجلس آتیٹ ایمنی و دیمروی نا دعویٰ تے کریسہ کیک، ولے عملی گواچنی دادے کہ رکھ ئنا خُلیس نا پِن آ اہم کسرک بند ءُ۔ کوسٹل ہائی وے، کوئٹہ-کراچی کسر و پنجاب ءِ گنڈوک زمینی و ریلوے کسرک بیدس پڑو بند کننگانو۔ دا پلویڑ بلوچستان ءِ ملک ئنا تہہ آن عمل ئٹ جتا کرینے۔
انٹرنیٹ نا بند کننگ ئٹ مزاحمت ءِ توروکا فارمولا بھاز خراب بے سہب مسنے۔ داسہ نا ہفتہ تیٹ رخشان ڈویژن نا ضلع واشک نا بسیمہ ئٹ فوجی کیمپ آ جلہو ئٹ اسہ کیپٹن اسیتون اوار نو کارندہ مرگ ئنا گواچی مسر، و دن انگا جلہوک جتا علاقہ تیٹ برجاء ءُ۔
الس ءِ لنگڑ، بے پوریا و گھیڑ کریسہ آزاتی نا جشن ئنا بیرک آک خلنگ مننگ کیرہ، ولے نئے آجوئی نا تحریک ایسر مرو و نئے کہ سرمایہ کاری نا ماحول جوڑ مرو۔ دا پالیسیک بیرہ لس بند غ آتا ٹپ آتے خازہ کرور۔ دیہاڑ نا اندا ردی تے ولدا کریسہ مقتدر ادارہ غاک وختی بیانیہ تو جوڑ کننگ کیرہ، ولے زمینی گواچنی ءِ بدل کننگ نا وس اوفتا دوٹی اف۔