بلوچستان نا ضلع خضدار آن رسینگوک احوال آتا ردئٹ درو وڈھ ئنا ہند آن پاکستانی فورسز و اونا مخ تف ٹولی اسہ مسافر ویگن ئسے برمتہ کریسہ نا درست ہند ئسے آ درینے ۔
خن خنوک شاہد آتا ردئٹ دا ویگن بلوچستان نا صنعتی شار حب آن خضدار نا تحصیل زہری آ ہننگ ئس، ہرادے کسر آ توننگا زالبول آتے یلہ کننگانے، اندن ویگن نا ڈرائیور تون اوار کم و ود پانزدہ نرینہ مسافر آتے بندی کننگانے ۔
تدینی نا برخلاف اینو زہری شار ئٹی تیوہ شٹرڈاٶن ہڑتال مس، اندن مسافر آتا خاہوت و ہندی شاریک زاوہ نا ہند آن بنجائی آر سی ڈی کسر ءِ بند کرینو و پاننگو کہ اسکان ننا بندغ آتے آجو کننگتنے ننا تولوک برانز برجاء مرو ۔
یاتی مرے کہ تدوکا کیہی دے تیان زہری و ایب کیب نا علاقہ آتیٹ لشکر کشی برجاء ءِ ، ہراڑے جتاء ہند آتیا بلوچ آزاتی دوست تنظیم آتا پارہ غان جلہو تیٹ پاکستانی فورسز ءِ جانی و مالی نسخان تننگانے۔
ہندی بندغ آتا ردئٹ پاکستانی فورسز و ڈیتھ اسکواڈ شفیق مینگل نا مخ تفی ٹی مسافر آتے بندی کریسہ گمانی ردئٹ علاقہ نا حالیت نا بابت ئٹ سر و سوج ہم کرینو ۔
گیشتر برمتہ کروک مسہ مسافر آتے یلہ کرینو ، کیہیک دائسکان آجو کننگتنو ۔